बावची : "गोकुळ आणि सहकार क्षेत्रात होत असलेल्या फसवणुकीविरोधात आमचा संघर्ष सुरू असून, छत्रपती शिवाजी महाराजांचे आशीर्वाद आणि त्यांच्या विचारांच्या बळावर आम्ही या सर्व संकटांवर नक्कीच मात करू," असा ठाम विश्वास काँग्रेसचे नेते आमदार सतेज पाटील यांनी व्यक्त केला. बावची (ता. वाळवा, सांगली)  येथे छत्रपती शिवाजी महाराजांच्या भव्य अश्वारूढ पुतळ्याच्या लोकार्पण सोहळ्यात प्रमुख पाहुणे म्हणून ते बोलत होते.

कार्यक्रमात उपस्थितांना संबोधित करताना आमदार सतेज पाटील पुढे म्हणाले की, कोणत्याही संकटाचा सामना कसा करावा आणि त्याच्यावर मात कशी करावी, याची शिकवण आम्हा सर्वांना छत्रपती शिवाजी महाराजांच्या विचारांतूनच मिळाली आहे. त्यामुळे सहकार क्षेत्रातील अन्यायाविरुद्धचा हा लढा शेवटपर्यंत लढणार असल्याचे त्यांनी स्पष्ट केले.
हा सोहळा आमदार जयंत पाटील, हर्षदा देशमुख-जाधव आणि राजारामबापू सहकारी साखर कारखान्याचे अध्यक्ष प्रतीक पाटील आमदार गोपीचंद पडळकर सत्यजित देशमुख सदाभाऊ खोत यांच्या प्रमुख उपस्थितीत दिमाखात पार पडला.

या प्रसंगी सांगली जिल्हा परिषदेच्या अध्यक्षा संगीता पाटील, वाळवा पंचायत समितीचे सभापती उदय पाटील, डॉ. सचिन पाटील, राष्ट्रवादी काँग्रेसचे जिल्हाध्यक्ष देवराज पाटील, वैभव शिंदे, बाळासाहेब पाटील, विजयराव यादव, संग्राम फडतारे, धैर्यशील पाटील, लालासो अनुसे, वैभव रकटे, पेठवडगावचे उपनगराध्यक्ष अभिजीत गायकवाड, डॉ. विकास बामणे, सरपंच कविता अनुसे यांच्यासह सर्व आजी-माजी ग्रामपंचायत सदस्य, विविध तरुण मंडळांचे पदाधिकारी आणि नागरिक मोठ्या संख्येने उपस्थित होते.