मुंबई  : ​लाडक्या बाप्पाच्या आगमनाच्या उत्साहाला गालबोट लागले असून, शनिवारी रात्री मुंबईतील प्रसिद्ध 'भुलेश्वरचा राजा'च्या आगमन मिरवणुकीत झालेल्या अपघातात दोघांचा मृत्यू झाला आहे, तर पाच जण गंभीर जखमी झाले आहेत. या दुर्घटनेमुळे गणेशोत्सवाच्या आनंदात मोठी शोककळा पसरली असून सर्वत्र हळहळ व्यक्त होत आहे.

​मिळालेल्या माहितीनुसार, भुलेश्वरचा राजा सार्वजनिक गणेशोत्सव मंडळाची २२ फुटांची भव्य गणेशमूर्ती भायखळ्यावरून भुलेश्वर येथे आणली जात होती. आगमन मिरवणूक अंतिम टप्प्यात असताना आणि मंडळाच्या मंडपापासून अवघ्या ५० मीटर अंतरावर असताना अचानक ही मूर्ती कोसळली. मूर्ती अचानक खाली आल्यामुळे तिथे उपस्थित भाविकांमध्ये एकच धावपळ उडाली आणि काही लोक त्याखाली अडकले गेले.

​अपघाताची माहिती मिळताच अग्निशमन दल, पोलीस प्रशासन आणि राज्य राखीव पोलीस दलाचे जवान तातडीने घटनास्थळी दाखल झाले. प्रशासनाने तत्परतेने बचाव कार्य राबवून अडकलेल्या लोकांना बाहेर काढले आणि उपचारासाठी रुग्णालयात हलवले. या दुर्दैवी अपघातात संकेत नेवशे (वय ३३) आणि ब्रिजेश हेमंत जोशी (वय ३०) या दोघांचा मृत्यू झाला आहे. तसेच, जखमी झालेल्या पाच जणांमध्ये ५ आणि ७ वर्षांच्या दोन लहान मुलींचाही समावेश आहे. या सर्व जखमींवर सध्या जी.टी. रुग्णालय, रिलायन्स रुग्णालय, सैफी रुग्णालय आणि जे. जे. रुग्णालयात उपचार सुरू आहेत.