▪️कोल्हापूर :  कोल्हापूर जिल्ह्यात सर्वसामान्य नागरिकांच्या आरोग्यसेवेसाठी आणि गरजू रुग्णांच्या मदतीसाठी शिवसेना वैद्यकीय मदत कक्षाच्या माध्यमातून सुरू असलेले कार्य निश्चितच कौतुकास्पद आहे, असे गौरवउद्गार महाराष्ट्राचे गृहराज्यमंत्री योगेश कदम यांनी काढले.

कोल्हापूर विमानतळ येथे गृहराज्यमंत्री योगेश रामदास कदम यांचे शिवसेना वैद्यकीय मदत कक्षाचे पश्चिम महाराष्ट्र संपर्कप्रमुख प्रशांत साळुंखे यांनी स्वागत केले. यावेळी विविध सामाजिक, राजकीय आणि जनहिताच्या विषयांवर महत्त्वपूर्ण चर्चा करण्यात आली.
यावेळी शिवसेना वैद्यकीय मदत कक्षाचे संस्थापक व कक्षप्रमुख मंगेश चिवटे यांच्या शिक्षक आमदार निवडणुकीच्या पार्श्वभूमीवर तयार करण्यात आलेले प्रचार माहिती पत्रक गृहराज्यमंत्री योगेश कदम यांच्या हस्ते प्रसारित करण्यात आले.

तसेच कोल्हापूर जिल्ह्यात शिवसेना वैद्यकीय मदत कक्षाच्या माध्यमातून राबविण्यात येणारे आरोग्यविषयक उपक्रम, गरजू रुग्णांना मदत, शासकीय आरोग्य योजनांचा लाभ नागरिकांपर्यंत पोहोचविणे आणि जनसेवेचे विविध उपक्रम याबाबत पदाधिकाऱ्यांनी माहिती दिली.

“जनतेच्या अडचणीच्या काळात त्यांच्या पाठीशी उभे राहणे हीच खरी जनसेवा आहे. कोल्हापूर जिल्ह्यात वैद्यकीय मदत कक्षाच्या माध्यमातून सुरू असलेले कार्य निश्चितच प्रशंसनीय आहे,” अशी भावना यावेळी गृहराज्यमंत्री योगेश कदम यांनी व्यक्त केली.
यावेळी पश्चिम महाराष्ट्र संपर्कप्रमुख प्रशांत साळुंखे, जिल्हाप्रमुख मनमोहन खोत, शहरप्रमुख विनायक जाधव, उपशहरप्रमुख अतुल साळोखे, लक्ष्मण सुरवसे, जीवन धुळूप आदी उपस्थित होते.