शिरटी : सहकारमहर्षी स्व. शामरावअण्णा पाटील यड्रावकर यांच्या पुण्यतिथीनिमित्त शिरोळ तालुक्यात राबविण्यात येत असलेल्या मोफत आरोग्य व नेत्र तपासणी अभियानांतर्गत शिरटी येथे आयोजित शिबिरात २७२ नागरिकांची आरोग्य तपासणी करण्यात आली. या शिबिरानंतर अभियानातील एकूण लाभार्थ्यांची संख्या ८ हजार ८२७ वर पोहोचली आहे. या आरोग्य शिबिराला अजय पाटील यड्रावकर यांनी भेट दिली.

आमदार डॉ. राजेंद्र पाटील यड्रावकर सोशल फाउंडेशन आणि शरद आयुर्वेद मेडिकल कॉलेज, हॉस्पिटल अँड रिसर्च सेंटर, यड्राव यांच्या संयुक्त विद्यमाने या शिबिराचे आयोजन करण्यात आले. ग्रामीण भागातील नागरिकांना मोफत आरोग्यसेवा उपलब्ध करून देणे, विविध आजारांचे वेळेत निदान करणे आणि आरोग्याविषयी जनजागृती करणे, हा या अभियानाचा मुख्य उद्देश आहे.

स्व. शामरावअण्णा पाटील यड्रावकर यांच्या पुण्यतिथीनिमित्त सुरू असलेल्या या अभियानाला शिरोळ तालुक्यातील विविध गावांमध्ये नागरिकांचा उत्स्फूर्त प्रतिसाद मिळत आहे. शिरटी येथील शिबिरातही नागरिकांनी सहभाग घेत मोफत आरोग्य तपासणीचा लाभ घेतला. गावोगावी आयोजित करण्यात येणाऱ्या या शिबिरांमुळे ग्रामीण भागातील नागरिकांना आपल्या गावातच आरोग्य तपासणीची सुविधा उपलब्ध होत आहे.

या अभियानाच्या माध्यमातून नागरिकांमध्ये आरोग्य तपासणीबाबत जागरूकता निर्माण होत असून, आजारांचे वेळीच निदान करण्यास मदत होत आहे.
यावेळी अण्णासो सुतार, सूर्यकांत उदगाव, दत्तात्रय माळी, ऋषभ पाटील, स्वप्निल पाटील, शांतिनाथ चौगुले यांच्यासह पदाधिकारी उपस्थित होते.