◼️पुणे पदवीधर व शिक्षक मतदारसंघाच्या निवडणुकीसाठी धैर्यप्रसाद मंगल कार्यालयात दुपारी 2 : 30 वाजता मेळावा

कोल्हापूर : महाराष्ट्र विधान परिषदेच्या पुणे विभाग पदवीधर व शिक्षक मतदारसंघाच्या निवडणुकीच्या पार्श्वभूमीवर मुख्यमंत्री देवेंद्र फडणवीस उद्या, सोमवार दि. १९ ऑक्टोबर रोजी कोल्हापूर आणि सांगली जिल्ह्याच्या दौऱ्यावर येत आहेत. या दौऱ्यामुळे भाजपा महायुतीच्या प्रचाराला नवी ऊर्जा आणि गती मिळणार आहे, अशी माहिती भाजपा प्रदेश सरचिटणीस राजेश पांडे यांनी दिली.

पुणे पदवीधर मतदारसंघाच्या महायुतीच्या उमेदवार डॉ. स्मिता योगेश जाधव आणि शिक्षक मतदारसंघाचे उमेदवार कौस्तुभ गावडे यांच्या प्रचारार्थ कोल्हापुरातील ताराबाई पार्क येथील धैर्यप्रसाद मंगल कार्यालयात दुपारी 2 : 30 वाजता पदवीधर, शिक्षक आणि संस्थाचालकांचा मेळावा आयोजित करण्यात आला आहे. या मेळाव्याला मुख्यमंत्री देवेंद्र फडणवीस संबोधित करणार आहेत.

या कार्यक्रमाला जिल्ह्यातील मंत्री, खासदार, आमदार, भाजपा व महायुतीचे वरिष्ठ नेते, घटक पक्षांचे प्रमुख पदाधिकारी, कार्यकर्ते, शैक्षणिक संस्थांचे संचालक तसेच पदवीधर व शिक्षक मतदार उपस्थित राहणार आहेत. या संवादातून महायुतीची भूमिका, विकासाचा दृष्टिकोन आणि आगामी वाटचाल मतदारांपर्यंत पोहोचविण्यावर भर दिला जाणार आहे.

प्रदेशाध्यक्ष रवींद्र चव्हाण यांनी कोल्हापूर आणि सांगली जिल्ह्यांतील संघटनात्मक बैठकांच्या माध्यमातून निवडणुकीच्या तयारीचा आढावा घेतला आहे. त्यानंतर मुख्यमंत्री देवेंद्र फडणवीस यांच्या दौऱ्यामुळे प्रचाराचे नियोजन अधिक प्रभावी होण्यास मदत होणार आहे. पदवीधर व शिक्षक मतदारांशी थेट संवाद साधण्याच्या दृष्टीने हा दौरा महत्त्वपूर्ण ठरणार आहे.

राजेश पांडे म्हणाले, “पदवीधर आणि शिक्षक मतदारसंघाच्या निवडणुकीच्या अंतिम टप्प्यात मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांचा कोल्हापूर व सांगली जिल्ह्यांचा दौरा महायुतीच्या प्रचाराला निश्चितच बळ देणारा ठरेल. या दोन्ही जिल्ह्यांतील पदवीधर, शिक्षक, संस्थाचालक आणि कार्यकर्त्यांशी संवाद साधून निवडणुकीच्या तयारीला अधिक गती मिळेल.”