कणेरी : सिद्धगिरी हॉस्पिटल अँड रिसर्च सेंटर, कणेरीमठ येथे १३-१४ जून  रोजी ‘NSI (Neurological Society of India) मायक्रोव्हॅस्क्युलर ॲनास्टोमोसिस वर्कशॉप २०२६’ अत्यंत यशस्वीरित्या पार पडली. जागतिक कीर्तीचे न्यूरोसर्जन डॉ. शिवशंकर मारजवके यांच्या नेतृत्वाखाली झालेल्या या कार्यशाळेत देशातील विविध राज्यांतून आलेल्या २० न्यूरोसर्जन्ससह आफ्रिका खंडातील तज्ज्ञांचा सहभाग होता.

कार्यशाळेचे उद्घाटन परमपूज्य श्री अद्श्य काडसिद्धेश्वर स्वामीजींच्या हस्ते झाले. या उपक्रमामुळे सिद्धगिरी हॉस्पिटलने पुन्हा एकदा जागतिक दर्जाची आरोग्यसेवा आणि शिक्षण ग्रामीण भागात उपलब्ध करून दिले आहे. 

ब्रेन बायपास अर्थात मायक्रोव्हॅस्क्युलर ॲनास्टोमोसिस ही न्यूरोसर्जरीतील अत्यंत क्लिष्ट शस्त्रक्रिया असून, ती आतापर्यंत केवळ महानगरातील कॉर्पोरेट रुग्णालयांपुरती मर्यादित होती; परंतु डॉ. मारजवके यांनी ती ग्रामीण भागातील धर्मदाय रुग्णालयात यशस्वीपणे राबवून नवा इतिहास रचला आहे.

या कार्यशाळेत डॉ. प्रा. द्वारकानाथ श्रीनिवास आणि डॉ. बुटक दियोरा यांच्यासह तज्ज्ञांनी सिलिकॉन ट्यूब व धमनी मॉडेलवर प्रशिक्षणाचे धडे दिले. कार्यशाळेच्या समारोपानंतर १५ जून रोजी 'मोया-मोया' (Moyamoya Disease) या दुर्मिळ आजारावरील ब्रेन बायपास शस्त्रक्रियेचे थेट (Live Surgery) प्रात्यक्षिकही दाखवण्यात आले.
डॉ. मारजवके यांच्या या उपक्रमामुळे ग्रामीण रुग्णालये ही जागतिक स्तरावर न्यूरोसर्जरी प्रशिक्षणाचे केंद्र बनू शकतात, हे सिद्ध झाले आहे. या ऐतिहासिक कामगिरीमुळे सिद्धगिरी हॉस्पिटलने कोल्हापूरचे नाव जागतिक नकाशावर कोरले असून, 'उत्कृष्टतेला पोस्टकोड नसतो' हे पुन्हा एकदा अधोरेखित केले आहे.