नवी दिल्ली : महाराष्ट्राच्या राजकारणात पुन्हा एकदा राजकीय भूकंपाचे धक्के बसण्याची शक्यता वर्तवण्यात येत आहे. उद्धव बाळासाहेब ठाकरे यांच्या शिवसेनेच्या गोटातून अत्यंत धक्कादायक बातमी समोर येत आहे. लोकसभेतील ठाकरे गटाच्या खासदारांमध्ये पडलेल्या फुटीची चर्चा सध्या दिल्लीच्या राजकीय वर्तुळात वाऱ्यासारखी पसरली असून, यामुळे ठाकरे गटाच्या चिंतेत मोठी वाढ झाली आहे.

सूत्रांनी दिलेल्या माहितीनुसार, ठाकरे गटातील तब्बल ६ खासदार पक्षापासून दूर जाण्याच्या पवित्र्यात आहेत. या हालचालींना राजकीय वर्तुळात ‘ऑपरेशन टायगर’ असे नाव दिले गेले आहे. हे खासदार एकनाथ शिंदे यांच्या शिवसेनेच्या संपर्कात असून, लवकरच एक नवीन गट स्थापन करण्याच्या तयारीत असल्याची चर्चा आहे.

 दिल्लीत या खासदारांनी लोकसभेचे अध्यक्ष ओम बिर्ला यांची भेट घेतल्याची जोरदार चर्चा सुरू झाल्याने ठाकरे गटात खळबळ उडाली आहे.

या फुटीच्या चर्चांनंतर ठाकरे गटाचे नेते खासदार संजय राऊत यांनी आक्रमक पवित्रा घेतला आहे. त्यांनी थेट आर्थिक व्यवहाराचे गंभीर आरोप करत, बंडखोर खासदारांना १५ कोटी रुपयांचा ‘अ‍ॅडव्हान्स’ मिळाल्याचा खळबळजनक दावा केला आहे. “ज्यांना जायचे आहे ते जातील, आम्ही कोणालाही अडवणार नाही,” असे म्हणत ठाकरे गटाने बंडखोरांना उघड आव्हान दिले आहे.

फुटीला लगाम घालण्यासाठी आता उद्धव ठाकरे यांनी आक्रमक पवित्रा घेतला आहे. पक्षाने येत्या १८ जून रोजी दिल्लीत सर्व खासदारांची तातडीची बैठक बोलावली असून, यासाठी अधिकृत ‘व्हीप’ जारी करण्यात आला आहे. जर या बैठकीला कुणी अनुपस्थित राहिले, तर त्यांच्यावर पक्षांतरबंदी कायद्यांतर्गत कडक कारवाई करण्याचा इशारा ठाकरे गटाने दिला आहे.

एकीकडे पक्षातील फुटीच्या बातम्यांनी जोर धरला असताना, दुसरीकडे काही खासदार अद्यापही उद्धव ठाकरे यांच्याशी एकनिष्ठ असल्याचे सांगत आहेत. खासदार राजाभाऊ वाजे यांच्यासारख्या नेत्यांनी आपण उद्धव ठाकरेंसोबत असल्याचे स्पष्ट करून फुटीच्या चर्चांना पूर्णविराम देण्याचा प्रयत्न केला आहे. मात्र, शिंदे गटाच्या नेत्यांनी “अनेक खासदार असमाधानी आहेत आणि आमच्या संपर्कात आहेत,” असे सूचक विधान करून ठाकरे गटावरील दबाव कायम ठेवला आहे.

१८ जून रोजी होणारी ही बैठक ठाकरे गटाच्या भविष्यातील वाटचालीसाठी अत्यंत महत्त्वाची ठरणार आहे. या बैठकीत किती खासदार उपस्थित राहतात आणि बंडखोर खासदार कोणती भूमिका घेतात, यावर आता संपूर्ण राज्याचे लक्ष लागून राहिले आहे..