कोल्हापूर : मराठा आरक्षण चळवळीचे जनक,मराठा महासंघाचे संस्थापक नेते तसेच माथाडी कामगारांचे नेते स्व. अण्णासाहेब पाटील यांच्या ९३ व्या जयंतीनिमित्त अण्णासाहेब पाटील आर्थिक मागास विकास महामंडळ येथे माहिती अधिकारी फारुक बागवान यांच्या हस्ते स्व. अण्णासाहेब पाटील यांच्या प्रतिमेचे पूजन व पुष्पहार अर्पण करुन अभिवादन करण्यात आले.

यावेळी उपस्थित अधिकारी, कर्मचारी व महामंडळाच्या लाभार्थ्यांनी स्व. अण्णासाहेब पाटील यांच्या प्रतिमेस अभिवादन करून त्यांच्या कार्याला आदरांजली वाहिली.

स्व. अण्णासाहेब पाटील यांनी समाजातील युवकांना उद्योग व व्यवसायाच्या माध्यमातून स्वावलंबी होण्यासाठी प्रेरणा दिली. समाजातील युवकांच्या आर्थिक व सामाजिक उन्नतीसाठी त्यांनी केलेले कार्य प्रेरणादायी आहे. त्यांच्या विचारातून प्रेरणा घेत महाराष्ट्रातील युवकांच्या उद्योजकतेला चालना देण्याचे कार्य अण्णासाहेब पाटील आर्थिक मागास विकास महामंडळाच्या माध्यमातून सुरू आहे.

यावेळी उपस्थित मान्यवरांनी स्व. अण्णासाहेब पाटील यांच्या सामाजिक, कामगार आणि उद्योजकीय कार्याचे स्मरण करून त्यांच्या विचारांना अभिवादन केले. समाजातील युवकांनी त्यांच्या कार्यातून प्रेरणा घेऊन स्वावलंबी व उद्योजक बनण्याचा प्रयत्न करावा, असे मत व्यक्त केले.

कार्यक्रमास अण्णासाहेब पाटील आर्थिक मागास विकास महामंडळ, जिल्हा कार्यालयातील अधिकारी, कर्मचारी तसेच महामंडळाचे लाभार्थी उपस्थित होते.