कोल्हापूर : गोकुळ मध्ये शासकीय सदस्य नेमणार, त्यांना मताचा अधिकार देणार अशी चर्चा आहे. मात्र, केवळ गोकुळसाठी सरकार असे काही करेल असे वाटत नाही. मात्र, त्यांनी असे काही केलेच तर आम्ही कोर्टात जाऊ, अशी भूमिका काँग्रेसचे विधानपरिषदेतील गटनेते आमदार सतेज पाटील यांनी रविवारी माध्यमांशी बोलताना मांडली.

आमदार पाटील म्हणाले, गोकुळ मध्ये शासकीय सदस्य नेमून त्यांना मताचा अधिकार देणार असतील तर मग जिल्हा परिषद, महापालिका, पंचायत समिती येथेही तज्ज्ञ सदस्य आहेत, त्यांनाही मताचा अधिकार देणार का?.

साडेपाच लाख शेतकऱ्यांनी समविचारी आघाडीला बहुमत दिले आहे. तांत्रिक मुद्द्यावरुन गोकुळची पहिली बैठक पुढे गेली आहे. उच्च न्यायालयाने पंधरा दिवसांत चेअरमनची निवड होणे गरजेचे असल्याचे मत नोंदवले आहे. सोमवारी सर्वोच्च न्यायालयात सुनावणी आहे. त्यामुळे आजच्या दिवशी तरी निर्णय होईल अशी अपेक्षा असल्याचे आमदार पाटील म्हणाले. आता सध्या हे प्रकरण न्यायालयात गेले आहे. ठरावधारकांनी आम्हाला बहुमत दिले आहे. त्यामुळे तांत्रिक मुद्दा न करता अध्यक्ष निवड व्हावी, अशी अपेक्षा आमदार पाटील यांनी व्यक्त केली.

◼️ आम्हाला मिळालेले बहुमत सत्ताधारी मान्य करायला तयार नाहीत. उलट त्यांनी पुढील पाच वर्षानंतर होणाऱ्या निवडणुकीच्या तयारीला लागावे. आमचे बहुमत पाच वर्षे असेच राहील, असा विश्वासही आमदार पाटील यांनी व्यक्त केला.