◼️‘पोषण तराजू’ उपक्रमातून मुलांना संतुलित आहाराचे महत्त्व

कोल्हापूर : राष्ट्रीय पोषण माह २०२६ निमित्त केर्ले येथील अंगणवाडी क्रमांक २०३ मध्ये मुलांसाठी पौष्टिक आहाराबाबत जनजागृतीपर उपक्रम राबविण्यात आला. या उपक्रमातून जंक फूडचे दुष्परिणाम समजावून सांगतानाच सकस व संतुलित आहाराचे महत्त्व प्रात्यक्षिकाद्वारे पटवून देण्यात आले.

‘पोषण तराजू’ या उपक्रमांतर्गत कुरकुरे यांसारखे जंक फूड आणि पौष्टिक फळे यांची तुलना करण्यात आली. जंक फूडमधून शरीराला आवश्यक पोषक घटक पुरेशा प्रमाणात मिळत नाहीत, तर फळांमधून जीवनसत्त्वे, खनिजे व इतर आवश्यक पोषक घटक मिळतात, हे मुलांना समजावून सांगण्यात आले. तसेच जंक फूडच्या अतिसेवनामुळे आरोग्यावर होणारे विपरीत परिणाम आणि पोटातील कृमींसारख्या आरोग्यविषयक समस्यांबाबतही मार्गदर्शन करण्यात आले.

मुलांनी जंक फूडचे सेवन टाळून आहारात फळे व इतर पौष्टिक पदार्थांचा समावेश करावा आणि निरोगी आरोग्यासाठी संतुलित आहाराच्या सवयी जोपासाव्यात, हा संदेश या उपक्रमातून देण्यात आला