कोल्हापूर :जिल्ह्यात अवैध व्यवसायांचे उच्चाटन करण्यासाठी पोलीस प्रमुख योगेश कुमार यांच्या मार्गदर्शनाखाली सुरू असलेल्या मोहिमेला मोठे यश आले आहे. स्थानिक गुन्हे अन्वेषण शाखेने (LCB) शाहूवाडी पोलीस ठाण्याच्या हद्दीत सापळा रचून गोवा बनावटीच्या दारूने भरलेला ट्रक जप्त केला असून, एकूण १ कोटी ७९ लाख ६ हजार २२० रुपयांचा मुद्देमाल हस्तगत केला आहे.

मिळालेल्या गुप्त माहितीनुसार, टाटा ट्रक (क्रमांक MH-27-BX-4756) मधून बांबवडे मार्गे कोल्हापूरच्या दिशेने अवैध दारूची वाहतूक होत होती. एलसीबीचे पोलीस निरीक्षक सुशांत चव्हाण व त्यांच्या पथकाने कापशी गावच्या बसस्टॉप चौकात हा ट्रक अडवला. चालकाची चौकशी केली असता त्याने उडवाउडवीची उत्तरे दिली, मात्र कसून तपासणी केली असता ट्रकमध्ये गोवा बनावटीच्या विदेशी दारूचे एकूण २४६८ बॉक्स मिळून आले. या दारूची किंमत सुमारे १ कोटी ६४ लाख ६ हजार २२० रुपये आहे.

याप्रकरणी ट्रकचालक संतोष बंडू पेटकर (रा. शिराळा नाका, इस्लामपूर) आणि माल पुरवणारा असीम अब्दुल्ला शेख (रा. देवास, मध्य प्रदेश) या दोघांना पोलिसांनी ताब्यात घेतले आहे. शाहूवाडी पोलीस ठाण्यात महाराष्ट्र दारूबंदी कायद्यान्वये गुन्हा दाखल करण्यात आला असून, पुढील तपास सुरू आहे.
ही कारवाई एलसीबीचे निरीक्षक सुशांत चव्हाण, सहाय्यक निरीक्षक सागर वाघ, उपनिरीक्षक शेष मोरे आणि सुरेश पाटील, रामचंद्र कोळी, रुपेश माने यांच्या पथकाने केली आहे.