कोल्हापूर : राजर्षी छत्रपती शाहू महाराज शासकीय औद्योगिक प्रशिक्षण संस्था, कळंबा रोड, कोल्हापूर यांचे राष्ट्रीय सेवा योजना सन 2025-26 मधील विशेष निवासी श्रमसंस्कार शिबिर 23 ते 29 मार्च या कालावधीत ग्रामपंचायत कणेरी, ता. करवीर येथे संपन्न झाले. 

शिबिरामध्ये दोन सत्रामध्ये कामे करण्यात आली. पहिल्या सत्रामध्ये गावातील सार्वजनिक स्वरूपाची तांत्रिक कामे करण्यात आली.

 यामध्ये प्रामुख्याने रंगकाम, फॅब्रिकेशन, वेल्डिंग, प्लंबिंग, इलेक्ट्रिशन विद्युत दुरुस्ती व नवीन लाईट फिटिंग, वृक्षसंगोपन यासारखी समाज उपयोगी कामे श्रमदानातुन करण्यात आली.

तर दुसऱ्या सत्रामध्ये स्वयंसेवकांना करिअर मार्गदर्शन, रोजगार संधी, लघुउद्योग, शेतीपूरक व्यवसाय व त्यामध्ये येणाऱ्या समस्या, आरोग्य ही धनसंपदा, योग व योगाभ्यास यासारख्या विषयावरती मार्गदर्शन करण्यात आले.

  या कार्यक्रमासाठी संस्थेचे प्राचार्य महेश आवटे यांनी तर तांत्रिक स्वरूपाच्या केलेल्या कामाबाबत काडसिद्धेश्वर स्वामींनी स्वयंसेवकांना प्रोत्साहित केले.

 निशांत पाटील, लोकनियुक्त सरपंच व अंजना जाधव ग्रामसेवक यांनीही स्वंयसेवकांच्या कामाबद्दल कौतुक केले. सिद्धगिरी कारागीर महाकुंभ 31 मार्च ते 4 एप्रिल या दरम्यान सुरू होणार असुन सतरा राज्यांमधून राज्य - राष्ट्रीय स्तरावर पारितोषिक प्राप्त दोनशेहून अधिक कलाकार सहभागी होणार आहेत. कार्यक्रमस्थळी स्वयंसेवकांनी केलेल्या तांत्रिक स्वरूपाच्या कामामुळे स्वयंसेवकांना उपस्थित राहण्याबाबत मठाकडून आमंत्रित केले गेले आहे.