कोल्हापूर  : ध्रुवतारा फाऊंडेशनतर्फे दिला जाणारा मानाचा चौथा 'खाशाबा जाधव पुरस्कार' १९६४ चे ऑलिंपिकपटू बंडा पाटील यांना जाहीर झाला आहे. मंगळवार, २३ जून रोजी सकाळी १० वाजता कोल्हापूरच्या ऐतिहासिक मेन राजाराम हायस्कूलच्या सभागृहात एका विशेष समारंभात हा पुरस्कार प्रदान केला जाणार असून, यात शाल, श्रीफळ, गौरवचिन्ह, रोख ५ हजार रुपये आणि पुस्तकाचा समावेश आहे.

 उद्योजक रोहित मुसळे आणि मनिष झंवर यांच्या हस्ते हा सन्मान सोहळा पार पडणार असून, याप्रसंगी विविध क्रीडा क्षेत्रातील मान्यवरांचाही गौरव केला जाणार असल्याचे फाऊंडेशनचे अध्यक्ष व लेखक संजय दुधाणे यांनी सांगितले. या पुरस्काराचे हे चौथे वर्ष असून, यापूर्वी मनोज पिंगळे, बालारफिक शेख आणि हर्षवर्धन सदगीर यांना या मानाने गौरवण्यात आले आहे.

 ऑलिंपिक दिनाचे औचित्य साधून लेखक संजय दुधाणे यांचे कोल्हापूर आणि कराडमध्ये तीन विशेष कार्यक्रम आयोजित केले आहेत. यामध्ये २२ जून रोजी आदर्श प्रशाला (शिवाजी पेठ) येथे विद्यार्थ्यांशी संवाद, २३ जून रोजी मुख्य पुरस्कार सोहळा आणि कराडमध्ये 'लेखक आपल्या भेटीला' या उपक्रमाद्वारे खाशाबा जाधव यांच्या जीवनप्रवासावर प्रकाश टाकला जाणार आहे.