कोल्हापूर : कोल्हापूरच्या फुलेवाडी परिसरात वन्यजीव तस्करी आणि बेकायदेशीर विक्री करणाऱ्यांविरुद्ध वनविभागाने सर्जिकल स्ट्राईक केला आहे. फुलेवाडी रिंग रोडवरील 'फ्रेंडशिप फिश कंपनी' येथे अनुसूचित-I मधील अत्यंत दुर्मिळ आणि संरक्षित असलेला 'शॉर्टफिन डेव्हिल रे' (Shortfin Devil Ray) हा मासा विक्रीसाठी ठेवल्याची गुप्त माहिती मिळताच वनविभागाने छापा टाकून तो जप्त केला.

दिनांक २५ फेब्रुवारी २०२६ रोजी मिळालेल्या खात्रीशीर बातमीवरून, करवीर वनपरिक्षेत्राच्या पथकाने ही धडक कारवाई केली. वन्यजीव संरक्षण अधिनियम १९७२ नुसार, हा मासा अत्यंत संरक्षित श्रेणीत येतो. याप्रकरणी सुनील विनोद सातपुते (राहणार येडेमच्छींद्र, ता. वाळवा, जि. सांगली) याला ताब्यात घेण्यात आले असून, त्याच्यावर गुन्हा नोंदवण्यात आला आहे.

उपवनसंरक्षक  धैर्यशील पाटील आणि सहाय्यक वनसंरक्षक  विलास काळे यांच्या मार्गदर्शनाखाली वनपरिक्षेत्र अधिकारी  नंदकुमार नलवडे व त्यांच्या टीमने ही धाडसी कारवाई पूर्ण केली. या कारवाईत वनपाल सागर कोळी, वनरक्षक ओंकार भोसले, विकास घोलप आणि इतर कर्मचाऱ्यांसह मानद वन्यजीव रक्षक रमण कुलकर्णी यांचा सहभाग होता.

कोल्हापुरात अशा प्रकारे दुर्मिळ सागरी जीवांची तस्करी उघड झाल्याने खळबळ उडाली असून, यामागे मोठे रॅकेट असण्याची शक्यता वर्तवली जात आहे.