शिरूर : शिरूरमधील रोहिदास नगर परिसरात महावितरणच्या भीषण आणि अक्षम्य हलगर्जीपणामुळे एका ७४ वर्षीय वृद्ध महिलेचा बळी गेल्याची अत्यंत संतापजनक घटना घडली आहे. रत्नाबाई धोंडीराम माने (वय ७४) असे दुर्दैवी मृत महिलेचे नाव आहे. या दुर्घटनेमुळे संतप्त नागरिकांनी महावितरणच्या अधिकाऱ्यांना धारेवर धरत तीव्र रोष व्यक्त केला आहे.

रोहिदास नगर परिसरातील जळाऊ लाकडांच्या ढिगाऱ्यावर एक  विद्युत तार तुटून पडली होती. या तुटलेल्या तारेमध्ये तब्बल २० केव्हीचा प्रवाह सुरू होता. आज सकाळी ८ वाजण्याच्या सुमारास याच विद्युत प्रवाहित तारेचा स्पर्श झाल्याने ७४ वर्षीय रत्नाबाई माने यांना तीव्र विजेचा धक्का बसला आणि त्यांचा जागीच दुर्दैवी मृत्यू झाला. सुदैवाने, वेळीच त्यांच्या नातवानं प्रसंगावधान दाखवल्यामुळे मोठा अनर्थ टळला. नागरिकांनी डीपिधून वीज पुरवठा बंद केल्यानंतर ही तुटलेली तार विद्युत पुरवठा खंडीत झाली.

या दुर्घटनेनंतर संतप्त नागरिकांनी आणि आंदोलन अंकुशचे धनाजी चुडमुंगे यांच्यासह अन्य ग्रामस्थांनी महावितरणच्या अधिकाऱ्यांना धारेवर धरले. शिरूर तालुक्यात अनेक ठिकाणी अजूनही जुन्या आणि जीर्ण विद्युत तारा व खांब कायम आहेत. महावितरणच्या या वाढत्या लापरवाह कारभारामुळे नागरिकांच्या जिवाशी खेळ सुरू असून, अशा धोकादायक ठिकाणांची तातडीने दुरुस्ती करण्यात यावी, अशी संतप्त मागणी नागरिकांमधून केली जात आहे.

वाढत्या जनक्षोभासमोर अखेर महावितरणला नमते घ्यावे लागले. महावितरणचे अभियंता ए. एन. अडके यांनी मृत रत्नाबाई यांच्या कुटुंबीयांना ६ लाख रुपयांची आर्थिक मदत जाहीर केली आहे. दरम्यान, शिरूर ग्रामीण रुग्णालयात मृतदेहाचे शवविच्छेदन झाल्यानंतर मृतदेह नातेवाईकांच्या ताब्यात देण्यात आला. या दुर्घटनेमुळे शिरूर परिसरातून हळहळ व्यक्त होत असून महावितरणच्या कारभाराविरोधात तीव्र संताप व्यक्त होत आहे.