◼️इचलकरंजी- शिरोळमधील वाहनधारकांची बहुप्रतिक्षित मागणी पूर्ण; १ ऑक्टोबरपासून चाचणी

जयसिंगपूर :
इचलकरंजी व शिरोळ तालुक्यातील वाहनधारकांची बहुप्रतिक्षित मागणी पूर्ण झाली असून, तारदाळ येथील कल्लाप्पाण्णा आवाडे टेक्स्टाईल इंडस्ट्रियल पार्कमधील चाचणी पथावर १ ऑक्टोबर २०२६ पासून हलकी (LMV) तसेच अवजड (HMV) अशा सर्व प्रकारच्या वाहनांच्या योग्यता प्रमाणपत्राची (Fitness Certificate) तपासणी करता येणार आहे, अशी माहिती आमदार राजेंद्र पाटील यड्रावकर यांनी दिली.

तारदाळ येथील स्थानिक चाचणी पथ नियमितपणे सुरू करण्याची मागणी होत होती या मागणीचा परिवहन विभागाकडे पाठपुरावा केल्यानंतर तारदाळ येथील चाचणी पथावर सर्व प्रकारच्या वाहनांच्या फिटनेस तपासणीस मान्यता मिळाली आहे.

यापूर्वी इचलकरंजी व शिरोळ परिसरातील वाहनधारकांना फिटनेस तपासणीसाठी कोल्हापूर येथील मोरेवाडी चाचणी पथावर जावे लागत होते. त्यामुळे सुमारे ६० ते ८० किलोमीटरचा अतिरिक्त प्रवास, तसेच वेळ, इंधन व श्रमाचा खर्च वाहनधारकांना सहन करावा लागत होता. आता तारदाळ येथेच ही सुविधा उपलब्ध झाल्याने वाहनधारकांची मोठी गैरसोय दूर होणार आहे.

या सुविधेमुळे स्थानिक वाहतूकदार, व्यावसायिक व व्यापाऱ्यांचा वेळ आणि इंधनावरील खर्च वाचणार असून, इचलकरंजीच्या वस्त्रोद्योगासह औद्योगिक मालाची वाहतूक अधिक सुलभ होण्यास मदत होणार आहे. परिवहन विभागाच्या या निर्णयाचे वाहनधारक व वाहतूकदारांतून स्वागत होत आहे.