मुंबई : अर्बन को-ऑपरेटिव्ह बँकिंग क्षेत्राला आधुनिक, पारदर्शक, विश्वासार्ह आणि तंत्रज्ञानाधिष्ठित बनविण्यासाठी ‘अंब्रेला ऑर्गनायझेशन’ महत्त्वाची भूमिका बजावणार आहे. यामुळे देशातील प्रत्येक तहसीलपर्यंत या बँकिंगचे जाळे विस्तारण्यास मोठी चालना मिळेल, असा विश्वास केंद्रीय सहकार मंत्री अमित शाह यांनी मुंबईत व्यक्त केला. तसेच, राष्ट्रीय शहरी सहकारी वित्त व विकास महामंडळाचे मुख्यालय दिल्लीहून महाराष्ट्रात हलवण्यात येईल, अशी महत्त्वाची घोषणा त्यांनी केली.

बीएसई इंटरनॅशनल कन्व्हेन्शन सेंटर येथे आयोजित ‘सहकार नव-क्रांती मेळावा’ कार्यक्रमात ते बोलत होते. यावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे, केंद्रीय राज्यमंत्री मुरलीधर मोहोळ यांच्यासह सहकार क्षेत्रातील मान्यवर उपस्थित होते.
केंद्रीय मंत्री शहा म्हणाले की, देशातील प्रत्येक अर्बन को-ऑपरेटिव्ह बँकेने ‘अंब्रेला ऑर्गनायझेशन’चे सदस्यत्व घेऊन सुरक्षा संचालन केंद्राशी जोडले जावे. यामुळे ठेवीदारांचा विश्वास वाढून बँकिंग क्षेत्र अधिक सुरक्षित होईल. देशातील सुमारे १,४०० अर्बन को-ऑपरेटिव्ह बँकांमध्ये सहा लाख कोटी रुपयांच्या ठेवी असून, देशाच्या आर्थिक विकासात या बँकांची भूमिका अत्यंत महत्त्वाची आहे. छोट्या कर्जदारांची कर्जफेडीची क्षमता उत्तम असून, विनातारण कर्ज मर्यादा अडीच लाखांवरून पाच लाख रुपये करण्यात आली आहे. महाराष्ट्रात ४४९ सहकारी बँका असून देशातील सहकार क्षेत्रात राज्याचे मोठे योगदान असल्याने अंब्रेला संस्थेचे मुख्यालय महाराष्ट्रात असणे अधिक उपयुक्त ठरेल, असे त्यांनी नमूद केले.

डिजिटल फसवणूक रोखण्यासाठी ऑनलाइन बँकिंग सुरक्षित करणे आवश्यक असून, नॅशनल फॉरेन्सिक सायन्सेस युनिव्हर्सिटीसोबत झालेल्या सामंजस्य करारामुळे सायबर सुरक्षा आणि डिजिटल फॉरेन्सिक सुविधेचा लाभ मिळणार आहे. कार्यक्रमात केंद्रीय मंत्र्यांच्या हस्ते शहरी सहकारी बँकांसाठी सायबर सुरक्षेसंदर्भातील 'सिक्युरिटी ऑपरेशन्स सेंटर'चे उद्घाटन करण्यात आले आणि विविध उपक्रमांचे लोकार्पण व ग्रंथ प्रकाशन झाले.