कोल्हापूर  : कोल्हापुरात राजर्षी शाहू छत्रपती महाराजांच्या विचारानंतर शैक्षणिक व सामाजिक क्षेत्रात मोलाचे योगदान देणारे ज्येष्ठ शिक्षणमहर्षी पद्मश्री डॉ. डी. वाय. पाटील यांच्या स्मरणार्थ कोल्हापूर येथे काँग्रेस कमिटीमध्ये एका सर्वपक्षीय शोकसभेचे आयोजन करण्यात आले. या शोकसभेमध्ये डॉ. पाटील यांच्या कार्याचा गौरव करत शहरात त्यांचे भव्य स्मारक उभारण्याचा महत्वपूर्ण निर्धार सर्वपक्षीय मान्यवरांनी व्यक्त केला.

कोल्हापुरात जिल्हा काँग्रेस कमिटी मध्ये झालेल्या शोकसभेत खासदार शाहू छत्रपती यांनी डॉ. डी. वाय. पाटील यांच्याशी माझी १९७० पासून मैत्री होती. त्यांनी राजकारणात वेगळी छाप पाडत राजकारणापासून दूर होऊन शिक्षण संस्थांचे देशभर जाळे उभे केले आणि बहुजन विद्यार्थ्यांना वैद्यकीय व अभियांत्रिकी शिक्षणाची संधी उपलब्ध करून दिली.तीन राज्यांचे राज्यपाल म्हणूनही त्यांनी काम केले. जनतेच्या हितासाठी त्यांनी केलेले कार्य उल्लेखनीय आहे. असे मनोगत व्यक्त केले.

 नामदार हसन मुश्रीफ म्हणाले डी. वाय. पाटील यांच्या आध्यात्मिक वृत्तीमुळे त्यांची नियत आणि दानत अखेरपर्यंत चांगली राहिली.
  महापौर रूपाराणी निकम म्हणाल्या "कोल्हापूरसह संपूर्ण राज्यात विस्तारलेल्या शैक्षणिक क्षेत्राचा आढावा खासदार श्रीमंत शाहू महाराज यांनी घेतला, तर कोल्हापुरातील ज्ञानप्रवाहाचा अस्त झाल्याची भावना व्यक्त करत डॉ. पाटील यांचे भव्य स्मारक शहरात उभारण्याची गवाही त्यांनी दिली.
 तसेच माजी आमदार संपतराव पवार-पाटील यांनी डॉ. पाटील यांच्या रूपानं बहुजन समाजाचे अष्टपैलू व्यक्तित्व काळानं हिरावून नेलं आहे. अशी भावना व्यक्त केली. शिवसेना ठाकरे गटाचे विजय देवणे यांनी डॉ. डी. वाय. पाटील यांच्या स्मरणार्थ व्याख्यानमाला सुरू करण्याची सूचना केली.

 यावेळी उदय नारकर, डी. जी. भास्कर, राजू चव्हाण, अनिल लवेकर, बबन रानगे, कौस्तुभ गावडे, हिंदुराव चौगुले, अजितसिंह पाटील, पी. जी. यादव, स्वाभिमानी शेतकरी संघटनेचे अजित पोवार, माजी मंत्री भरमू पाटील, माजी आमदार गोपाळराव पाटील, उद्योजक व्ही. बी. पाटील, संजय घाटगे, सतीशचंद्र कांबळे, सरला पाटील, गोपाळ मर्दाने, सुभाष जाधव, वसंतराव मुळीक, सीमा पाटील, रणजित जाधव, भगवान पाटील, माजी आमदार राजू आवळे, राजीव आवळे, भूपाल शेटे, वसंत पाटील, सुभाष देसाई, दिलीप पवार, हसन देसाई आदींनी मनोगत व्यक्त केले.

जिल्हा परिषद अध्यक्ष शिल्पा खोत, प्रा. किसनराव कुराडे, बाळासाहेब खाडे, आर. के. पोवार, महानगरपालिकेचे विरोधी पक्षनेते राजेश लाटकर, काँग्रेसचे शहराध्यक्ष प्रवीण केसरकर यांच्यासह नगरसेवक, राजकीय पक्षांचे पदाधिकारी, सामाजिक कार्यकर्ते, शिक्षणप्रेमी व नागरिक उपस्थित होते.