कोल्हापूर: अंबाबाई मंदिराचा मुख्य गाभारा उद्यापासून ४ दिवस दर्शनासाठी बंद!
schedule13 Mar 26 person by visibility 172 categoryसामाजिक
◼️पुरातत्व विभागामार्फत संवर्धन प्रक्रिया; १८ मार्चपासून दर्शन होणार पूर्ववत
कोल्हापूर : करवीर निवासिनी श्री अंबाबाई (महालक्ष्मी) मंदिराच्या ऐतिहासिक वारशाचे जतन करण्यासाठी पुरातत्व विभागामार्फत सध्या संवर्धन आणि दुरुस्तीचे काम सुरू आहे. याच कामाचा एक महत्त्वाचा टप्पा म्हणून मंदिराच्या मुख्य गाभाऱ्याचे संवर्धन (Conservation) करण्यात येणार आहे. परिणामी, उद्या शनिवार १४ मार्च ते मंगळवार १७ मार्च २०२६ या चार दिवसांच्या कालावधीत भाविकांसाठी मुख्य गाभाऱ्यातील दर्शन बंद राहणार असल्याची अधिकृत माहिती श्रीपूजक मंडळाने प्रसिद्धीपत्रकाद्वारे दिली आहे.
मंदिराच्या मूळ रचनेला धक्का न लावता गाभाऱ्याची स्वच्छता आणि संवर्धन करणे तांत्रिकदृष्ट्या आवश्यक आहे. पुरातत्व विभागाच्या तज्ज्ञांच्या मार्गदर्शनाखाली हे काम होणार असून, या प्रक्रियेमुळे चार दिवस मुख्य मूर्तीचे दर्शन घेणे शक्य होणार नाही.
उत्सव मूर्ती दर्शन: मुख्य गाभारा बंद असला तरी भाविकांना देवीच्या 'उत्सव मूर्ती' आणि 'तत्त्व कळसाचे' दर्शन नेहमीप्रमाणे घेता येईल. धार्मिक विधी: मंदिरातील दैनंदिन नित्य धार्मिक विधी, पूजा आणि आरत्या परंपरेनुसार कोणत्याही व्यत्ययाशिवाय सुरू राहतील.
संवर्धनाचे काम पूर्ण झाल्यावर बुधवार, १८ मार्च २०२६ पासून भाविकांना मूळ मूर्तीचे दर्शन पूर्वीप्रमाणे नियमितपणे उपलब्ध होईल.
पश्चिम महाराष्ट्र देवस्थान व्यवस्थापन समिती आणि श्री करवीर निवासिनी अंबाबाई हक्कदार श्रीपूजक मंडळ यांनी भाविकांना या बदलाची नोंद घेऊन सहकार्य करण्याचे आवाहन केले आहे.
