कोल्हापूर  : गुंतवणूकदारांना कोट्यवधींचा गंडा घालून मागील ३ वर्षे २ महिने २७ दिवसांपासून पोलिसांना चकवा देणाऱ्या 'ए एस ट्रेडर्स' घोटाळ्यातील फरार संचालकाला अखेर बेड्या ठोकण्यात आल्या आहेत. संतोष नंदकुमार कुंभार (वय ४१, रा. दत्तनगर, पलुस) असे अटक केलेल्या संशयिताचे नाव असून, कोल्हापूर स्थानिक गुन्हे शाखेने  सांगली जिल्ह्यातील पलुस येथून त्याला थरारक पाठलाग करून ताब्यात घेतले.

'ए एस ट्रेडर्स अँड डेव्हलपर्स LLP' आणि तिची उपकंपनी 'TRADEWINGS SOLUTIONS LIMITED' च्या संचालकांनी गुंतवणुकीवर भरघोस परताव्याचे आमिष दाखवून हजारो गोरगरीब गुंतवणूकदारांची फसवणूक केली होती. पैसे हडप केल्यानंतर कार्यालये बंद करून हे संचालक पसार झाले होते. याप्रकरणी शाहूपुरी पोलीस ठाण्यात गुन्हा दाखल आहे.

पोलीस अधीक्षक  योगेशकुमार गुप्ता यांच्या मार्गदर्शनाखाली आर्थिक गुन्हे शाखेचे तपास अधिकारी पोलीस निरीक्षक सुशांत चव्हाण यांनी या फरार आरोपीचा शोध घेण्यासाठी विशेष चक्रावले फिरवले होते. तांत्रिक तपासाच्या आधारे, पोलीस उपनिरीक्षक जालिंदर जाधव आणि त्यांच्या पथकाने २४ फेब्रुवारी २०२६ रोजी सापळा रचून कुंभारला जेरबंद केले.

 या महाघोटाळ्यात आतापर्यंत २० आरोपींना अटक करण्यात आली आहे. मात्र, अजूनही १६ आरोपी फरार आहेत.

"गुंतवणूकदारांच्या कष्टाचा पैसा हडप करणाऱ्या एकाही आरोपीला सोडले जाणार नाही," असा कडक इशारा या कारवाईनंतर प्रशासनाकडून देण्यात आला आहे. या कारवाईत पीएसआय जालिंदर जाधव, युवराज पाटील, अमित सर्जे आणि राजू येडगे यांनी मोलाची भूमिका बजावली.