कोल्हापूर : जिल्ह्यात सुरू असलेल्या संततधार पावसामुळे नद्यांच्या पाणी पातळीत वाढ झाली असून, कोल्हापूर पाटबंधारे विभागाने (उत्तर) दिलेल्या माहितीनुसार, दिनांक ०७/०७/२०२६ रोजी वेदगंगा आणि हिरण्यकेशी या दोन नद्यांनी इशारा पातळी ओलांडली आहे.
पाटबंधारे विभागाच्या सकाळी ७:०० वाजताच्या अहवालानुसार, जिल्ह्यातील इतर नद्यांची पाणी पातळी सध्या इशारा पातळीच्या खाली असली तरी, नदीकाठच्या रहिवाशांनी सतर्क राहण्याचे आवाहन करण्यात आले आहे. पावसामुळे जिल्ह्यातील एकूण ५७ कोल्हापूर पद्धतीचे (को. प.) बंधारे पाण्याखाली गेले आहेत.

 ◼️नद्यांची स्थिती: वेदगंगा नदी (बाणगे पूल) आणि हिरण्यकेशी नदी (भडगाव पूल) या नद्यांनी इशारा पातळी ओलांडली आहे. इतर प्रमुख नद्यांची पाणी पातळी इशारा पातळीच्या खाली आहे.

◼️ पावसाचा जोर: धरणांच्या पाणलोट क्षेत्रात पावसाचा जोर कायम असून, सर्वाधिक पाऊस राधानगरी (१७६ मि.मी.) आणि दुधगंगा (१७७ मि.मी.) धरण क्षेत्रात नोंदवला गेला आहे.

 ◼️बंधारे: पंचगंगा, भोगावती, तुळशी, कासारी, कुंभी, धामणी, वारणा, कडवी, दुधगंगा, शाळी, वेदगंगा, हिरण्यकेशी, घटप्रभा, ताम्रपर्णी आणि चित्री अशा विविध नद्यांवरील एकूण ५७ बंधारे पाण्याखाली गेले आहेत.
पूर नियंत्रण कक्षाकडून परिस्थितीवर लक्ष ठेवले जात असून, नदीकाठच्या नागरिकांनी सतर्कता बाळगावी, अशी सूचना प्रशासनाकडून देण्यात आली आहे.