कोल्हापूर : बारावी विज्ञान शाखा उत्तीर्ण होऊन अभियांत्रिकीच्या प्रथम वर्ष प्रवेशासाठी इच्छुक विद्यार्थ्यांसाठी शिवाजी विद्यापीठाच्या स्कूल ऑफ इंजिनिअरिंग अँड टेक्नॉलॉजी यांच्या वतीने ऑनलाईन मध्यवर्ती प्रवेश प्रक्रियेबाबत २७ जून रोजी मार्गदर्शनपर चर्चासत्राचे आयोजन करण्यात आले आहे.

या चर्चासत्रामध्ये विद्यार्थी व पालकांना केंद्रीय प्रवेश प्रक्रियेसंदर्भात संपूर्ण माहिती देण्यात येणार असून नोंदणी प्रक्रिया, आवश्यक कागदपत्रे, ई-स्क्रुटिनी, मेरिट लिस्ट, ऑप्शन फॉर्म भरण्याची पद्धत, प्रवेशाच्या विविध फेऱ्या, महाविद्यालय व शाखा निवडीचे निकष, शुल्क संरचना तसेच प्रवेश प्रक्रियेदरम्यान घ्यावयाची काळजी याबाबत सविस्तर मार्गदर्शन केले जाणार आहे.

 सध्याच्या स्पर्धात्मक वातावरणात योग्य माहितीच्या अभावामुळे अनेक विद्यार्थी प्रवेश प्रक्रियेत अडचणींना सामोरे जातात. या पार्श्वभूमीवर आयोजित करण्यात आलेले हे चर्चासत्र विद्यार्थ्यांच्या शंकांचे निरसन करून त्यांना त्यांच्या गुणांनुसार आणि आवडीनुसार योग्य महाविद्यालय व शाखा निवडण्यासाठी उपयुक्त ठरणार आहे. तसेच प्रवेश प्रक्रियेत होणाऱ्या सामान्य चुका टाळण्याच्या दृष्टीनेही ते महत्त्वाचे आहे. 
चर्चासत्रात स्कूल ऑफ इंजिनिअरिंग अँड टेक्नॉलॉजीचे प्रशिक्षण व प्लेसमेंट सेल समन्वयक डॉ. गणेश पाटील मार्गदर्शन करणार आहेत, अशी माहिती स्कूलचे संचालक डॉ. अजित कोळेकर यांनी दिली.

विद्यापीठाच्या स्कूल ऑफ इंजिनिअरिंग अँड टेक्नॉलॉजी (डिपार्टमेंट ऑफ टेक्नॉलॉजी) येथे शनिवार, दि. २७ जून २०२६ रोजी सकाळी १०.३० वाजता हे मार्गदर्शन चर्चासत्र आयोजित करण्यात आले आहे. अभियांत्रिकी प्रवेशासाठी इच्छुक विद्यार्थी व पालकांनी या चर्चासत्राचा लाभ घ्यावा, असे आवाहन करण्यात आले आहे.