कोल्हापूर : राज्य शासनाने आज प्रशासकीय स्तरावर महत्त्वाचे फेरबदल केले असून, कोल्हापूर महानगरपालिकेच्या आयुक्त श्रीमती के. मंजुलक्ष्मी (IAS) यांची बदली करण्यात आली आहे. त्यांच्या जागी आता डॉ. राजेंद्र भारूड (IAS) यांची कोल्हापूर महापालिकेचे नवे आयुक्त म्हणून नियुक्ती करण्यात आली आहे.

मिळालेल्या माहितीनुसार, के. मंजुलक्ष्मी यांची नियुक्ती आता पुणे महानगर प्रदेश विकास प्राधिकरण (PMRDA) येथे 'अतिरिक्त आयुक्त' या रिक्त पदावर करण्यात आली आहे. त्यांनी आपला सध्याचा पदभार डॉ. राजेंद्र भारूड यांच्याकडे सोपवून तातडीने नवीन पदाचा कार्यभार स्वीकारण्याचे आदेश सामान्य प्रशासन विभागाने दिले आहेत.

नूतन आयुक्त डॉ. राजेंद्र भारूड हे यापूर्वी मुंबई येथे 'राष्ट्रीय उच्चस्तर शिक्षा अभियान' (RUSA) चे प्रकल्प संचालक म्हणून कार्यरत होते. त्यांच्या प्रशासकीय अनुभवाचा फायदा आता कोल्हापूर शहराच्या विकासकामांना गती देण्यासाठी होईल, अशी अपेक्षा व्यक्त केली जात आहे. कोल्हापूरच्या राजकारणात आणि प्रशासकीय वर्तुळात या बदल्यांची मोठी चर्चा सुरू आहे.