कोल्हापूर : कोल्हापूरचे अपर जिल्हाधिकारी संजय शंकर शिंदे यांची आज राज्य शासनाने तडकाफडकी बदली केली आहे. महाराष्ट्र शासनाच्या महसूल व वन विभागाने गुरुवारी (२ एप्रिल) यासंदर्भातील अधिकृत आदेश निर्गमित केले असून, शिंदे यांना तातडीने सध्याच्या पदावरून 'एकतर्फी' कार्यमुक्त करण्यात आले आहे.

प्रशासकीय सोय आणि सार्वजनिक हिताचे कारण देत शासनाने ही बदली केली आहे. विशेष म्हणजे, संजय शिंदे यांना कोठे नियुक्त केले आहे, याचे आदेश स्वतंत्रपणे काढले जाणार असल्याचे स्पष्ट करण्यात आले आहे. तोपर्यंत त्यांना मुंबईतील महसूल व वन विभागाच्या अपर मुख्य सचिवांकडे तात्काळ रुजू होण्याचे निर्देश देण्यात आले आहेत. या आदेशानुसार, त्यांना आजच (२ एप्रिल) दुपारी आपल्या पदाचा कार्यभार सोडून नवीन ठिकाणी हजर व्हावे लागणार आहे.

शासनाने या बदली प्रक्रियेत अत्यंत कडक भूमिका घेतली असून, शिंदे यांनी पदस्थापनेच्या ठिकाणी वेळेत रुजू न झाल्यास त्यांच्यावर शिस्तभंगाची कारवाई केली जाईल, असा इशाराही आदेशात दिला आहे. तसेच, या बदलीच्या पार्श्वभूमीवर त्यांना कोणतीही रजा मंजूर करू नये, असेही स्पष्ट करण्यात आले आहे.

 गेल्या काही दिवसांपासून कोल्हापूरच्या प्रशासकीय वर्तुळात बदल्यांचे वारे वाहत असतानाच, आज थेट शासन आदेश धडकल्याने महसूल विभागात मोठी खळबळ उडाली आहे. आता रिक्त झालेल्या अपर जिल्हाधिकारी पदावर शासन कोणाची नियुक्ती करते, याकडे सर्वांचे लक्ष लागले आहे.