बारामती: बारामती विधानसभा पोटनिवडणुकीच्या रिंगणातून ओबीसी हक्क आंदोलनाचे नेते लक्ष्मण हाके यांनी अधिकृतपणे माघार घेतली आहे. त्यांच्या या निर्णयामुळे बारामतीमधील राजकीय समीकरणे बदलण्याची शक्यता निर्माण झाली  आहे.

लक्ष्मण हाके यांनी आपली उमेदवारी मागे घेताना प्रामुख्याने ओबीसी समाजाच्या हिताचा आणि सध्याच्या राजकीय परिस्थितीचा विचार केल्याचे समजते. "ओबीसी आरक्षणाच्या मुद्द्यावर ठाम राहून आणि समाजाची मते विभागली जाऊ नयेत, या उद्देशाने आपण हा निर्णय घेत आहोत," असे संकेत त्यांच्या निकटवर्तीयांकडून देण्यात आले होते तसेच त्यांनी आज सकाळी पत्रकारांशी संवाद साधताना ही माहिती दिली आहे. सुनेत्रा पवार, मुख्यमंत्री; उपमुख्यमंत्री, आदी मान्यवरांनी उमेदवारी माघार घेण्याविषयी आवाहन केल्यामुळे आपण या निवडणुकीतून माघार घेत आहोत असे हाके यांनी सांगितले. मात्र समाजासाठी  लढा यापुढे सुरूच राहील असे त्यांनी नमूद केले.

हाके यांच्या उमेदवारीमुळे ही निवडणूक तिरंगी किंवा अधिक चुरशीची होईल, अशी चर्चा राजकीय वर्तुळात होती. मात्र, त्यांनी अर्ज मागे घेतल्याने आता प्रस्थापित उमेदवारांमधील लढत थेट होणार असल्याचे स्पष्ट झाले आहे. 
या माघारीनंतर बारामतीमधील निवडणुकीचे वातावरण अधिकच तापले असून, राजकीय पक्षांनी आपापली रणनीती आखण्यास सुरुवात केली आहे. लक्ष्मण हाके आता कोणाला पाठिंबा देतात की तटस्थ राहतात, याकडेही राजकीय विश्लेषकांचे लक्ष लागले आहे.