कोल्हापूर : क्रांतिबा फुले यांची १९९ वी जयंती आणि विश्वरत्न डॉ. बाबासाहेब आंबेडकर यांच्या १३५ व्या जयंतीनिमित्त कोल्हापुरात भव्य 'भीम फेस्टिव्हल' चे आयोजन करण्यात आले आहे. कालकथित माजी खासदार एस. के. डिगे मेमोरियल फाउंडेशनच्या वतीने ११ एप्रिल ते १४ एप्रिल २०२६ या कालावधीत हा महोत्सव पार पडणार असल्याची माहिती फाउंडेशनचे अध्यक्ष सदानंद डिगे यांनी पत्रकार परिषदेत दिली.

शनिवार, दि. ११ एप्रिल रोजी सकाळी ९ वाजता बिंदू चौक येथे माजी महापौर निलोफर आजरेकर यांच्या हस्ते दीपप्रज्वलनाने महोत्सवाची सुरुवात होईल. सायंकाळी ६:१५ वाजता आमदार डॉ. सुजित मिणचेकर यांच्या हस्ते महोत्सवाचे अधिकृत उद्घाटन होईल. यावेळी एल.आय.सी.च्या सौजन्याने उभारलेल्या LED भव्य संसद भवन प्रतिकृतीचे उद्घाटन आमदार छत्रपती मालोजीराजे यांच्या हस्ते करण्यात येणार आहे.

सोमवार, दि. १३ एप्रिल रोजी शाहू स्मारक भवन येथे 'धम्मरक्षिता' आणि 'समाजरत्न भीमक्रांती' पुरस्कारांचे वितरण मान्यवरांच्या हस्ते केले जाईल. यामध्ये समाजातील विविध क्षेत्रांत उल्लेखनीय कार्य करणाऱ्या महिला व पुरुषांचा गौरव केला जाणार आहे. याच दिवशी रात्री १२ वाजता बिंदू चौक येथे भव्य प्रबोधनात्मक आतषबाजीने महामानवांना अभिवादन करण्यात येईल.

१४ एप्रिल रोजी डॉ. बाबासाहेब आंबेडकर यांच्या जयंतीदिनी सकाळी संस्था कार्यालयात अभिवादन कार्यक्रम होईल, तर दुपारी १२ वाजता अंध व अपंग मुलांना भोजनदान करून सामाजिक बांधिलकी जपली जाणार आहे.

 या संपूर्ण भीम फेस्टिव्हलमध्ये ९०% महिलांचा सक्रिय सहभाग असणार आहे, जे या महोत्सवाचे प्रमुख आकर्षण ठरेल.

या महोत्सवात आमदार सतेज पाटील, ऋतुराज पाटील, राजेश लाटकर यांसह अनेक राजकीय व सामाजिक क्षेत्रातील मान्यवर उपस्थित राहणार आहेत. नागरिकांनी या सर्व प्रबोधनात्मक कार्यक्रमांना मोठ्या संख्येने उपस्थित राहावे, असे आवाहन सदानंद डिगे यांनी केले आहे.