कोल्हापूर : क्रांतिसूर्य महात्मा ज्योतिराव फुले यांच्या जन्मजयंती द्विशताब्दी वर्षाचे औचित्य साधून कोल्हापूर शहरात शनिवार, ११ एप्रिल रोजी एका भव्य 'ओबीसी जागृती परिषदे'चे आयोजन करण्यात आले आहे. सकाळी ११ ते सायंकाळी ५ या वेळेत जुना बुधवार पेठ येथील अभिषेक लॉन, ब्रह्मपुरी येथे ही परिषद पार पडणार आहे. राष्ट्रीय पिछडा वर्ग मोर्चा आणि कोल्हापूर जिल्ह्यातील सर्व ओबीसी संघटनांच्या संयुक्त विद्यमाने या कार्यक्रमाचे नियोजन करण्यात आले आहे.

या परिषदेचे उद्घाटन ज्येष्ठ विचारवंत बाबुराव गुरव, यांच्या हस्ते होणार असून, कार्यक्रमाचे अध्यक्षपद राष्ट्रीय पिछडा वर्ग मोर्चाचे राष्ट्रीय अध्यक्ष  चौधरी विकास पटेल  भूषवणार आहेत. ओबीसींचे आरक्षण, जातीनिहाय जनगणना आणि ओबीसी समाजापुढील ज्वलंत समस्यांचे निराकरण कसे करता येईल, यावर या परिषदेत सविस्तर मार्गदर्शन केले जाणार आहे.

या महत्त्वपूर्ण परिषदेमध्ये ओबीसी जन मोर्चाचे  दिगंबर लोहार , शाहू कॉलेजचे माजी प्राचार्य  राजेंद्र कुंभार, राष्ट्रीय पिछडा वर्ग मोर्चाचे महाराष्ट्र राज्य प्रभारी  प्रेमराज बोबडे आणि बामसेफ (नवी दिल्ली) चे उपाध्यक्ष  व्ही. बी. जाधव हे मान्यवर आपले विचार मांडणार आहेत.

ओबीसी समाजातील विविध प्रश्नांवर जनजागृती करण्यासाठी आयोजित केलेल्या या परिषदेला कोल्हापूर जिल्ह्यातील सर्व ओबीसी बांधवांनी मोठ्या संख्येने उपस्थित राहावे, असे आवाहन संयोजकांच्या वतीने करण्यात आले आहे.