◼️कोरे अभियांत्रिकीमध्ये ‘उच्च शिक्षण संस्थांमधील संशोधन संस्कृती वृद्धिंगत करणे’ या विषयावर चर्चासत्र

वारणानगर  : उच्च शिक्षण संस्थांनी पाठ्यपुस्तकी ज्ञानापुरते मर्यादित न राहता नाविन्यपूर्ण संशोधन, नवोपक्रम आणि उद्योगाभिमुख तंत्रज्ञानाला प्राधान्य द्यावे. समाजासमोरील आव्हानांवर उपाय शोधण्यासाठी सशक्त संशोधन संस्कृती विकसित करणे काळाची गरज आहे, असे प्रतिपादन डॉ. महादेव के. लोखंडे यांनी केले.

वारणा विद्यापीठाची मुख्य घटक संस्था असलेल्या तात्यासाहेब कोरे इन्स्टिट्यूट ऑफ इंजिनिअरिंग अँड टेक्नॉलॉजीच्या  रिसर्च अँड डेव्हलपमेंट सेल आणि इनोव्हेशन अँड एंटरप्रेन्योरशिप डेव्हलपमेंट सेल यांच्या संयुक्त विद्यमाने ‘उच्च शिक्षण संस्थांमधील संशोधन संस्कृती वृद्धिंगत करणे’ या विषयावर चर्चासत्र आयोजित करण्यात आले. 

वारणा विविध उद्योग व शिक्षण समूहाचे अध्यक्ष डॉ. विनयरावजी कोरे  यांच्या मार्गदर्शनाखाली संस्थेत संशोधन व नवोपक्रमांना प्रोत्साहन दिले जाते.

डॉ. लोखंडे यांनी आयआयटी मद्रास येथील पदव्युत्तर शिक्षण, मुंबई विद्यापीठातून मिळवलेली डॉक्टरेट आणि टाटा कन्सल्टिंग इंजिनिअर्समधील ३५ वर्षांहून अधिक अनुभवाच्या आधारे संशोधनाचे महत्त्व विशद केले. ओआरटी, जीएमआरटी आणि लायगो-इंडिया या वैज्ञानिक प्रकल्पांचा उल्लेख करत त्यांनी पेटंट आणि आंतरराष्ट्रीय दर्जाच्या शोधनिबंधांवर भर देण्याचे आवाहन केले.

अध्यक्षीय भाषणात वारणा विद्यापीठाचे कुलाधिकारी  एन. एच. पाटील यांनी ग्रामीण व औद्योगिक विकासाला चालना देणाऱ्या संशोधनाची गरज अधोरेखित केली. कुलगुरू डॉ. डी. टी. शिर्के यांनी संशोधनासाठी जिज्ञासा, सातत्यपूर्ण वाचन आणि चौकस विचार आवश्यक असल्याचे सांगितले.

यावेळी श्री वारणा विभाग शिक्षण मंडळाचे मुख्य कार्यकारी अधिकारी, डॉ. व्ही. व्ही. कारजिन्नी, प्राचार्य डॉ. के. आय. पाटील, अधिष्ठाता डॉ. एस. एम. पिसे, अधिष्ठाता संशोधन आणि नवोपक्रम, डॉ. राहुल काजवे, डॉ. कल्पना पाटील, डॉ .ए. एस. शेरीकर, प्रा. ए. आर. चौगुले, सरिता लोखंडे, विभागप्रमुख, प्राध्यापक व विद्यार्थी उपस्थित होते. सूत्रसंचालन अदिती घाटगे आणि अदिती पाटील यांनी केले, तर प्रा. सुभाष कोळी यांनी परिचय व आभारप्रदर्शन केले.