कोल्हापूर : येथील नव्यानेच उभारण्यात आलेल्या संभाजीनगर एस टी बस स्थानकाच्या मुख्य फलकावर 'कोल्हापूर' हे नाव लिहायचे राहून गेले आहे.
ही बाब 'शहरभान'च्यावतीने संभाजी नगर आगार व्यवस्थापक यांचे निदर्शनास आणून देण्यात आली.

कोणत्याही शहरांमध्ये जेव्हा बाहेरचे प्रवासी एस टी बसस्थानकावर पोहचतात तेव्हा तेथील नामफलकावरून आपण त्या शहरात आलेलो आहोत अशी माहिती त्यांना मिळत असते. मात्र कोल्हापूरच्या संभाजी नगर बसस्थानकावर पोहचल्यावर आपण नक्की कोल्हापूरातच पोहचलो आहोत काय..? असा संभ्रम प्रवाशाला पडावा अशी गोष्ट नकळतपणे संबंधित फलकामुळे होत आहे.

कारण फलकावर मोठ्या आकारात 'संभाजी नगर बसस्थानक' एवढाच उल्लेख आढळतो. त्यामुळे त्या फलकासमोर अथवा खालील बाजूस
'कोल्हापूर' असा ठळक शहराचाही उल्लेख करणे गरजेचे आहे.

कारण संभाजीनगर नावाचे वेगळे शहर आहे तर आपले हे संभाजीनगर बसस्थानक कोल्हापूरचे आहे.
ही बाब प्रवाशांना पटकन समजणे गरजेचे आहे. त्यांचे मनात कोणताही संभ्रम निर्माण होऊ नये. यासाठी 'कोल्हापूर' नावाचा समावेश करावा अशी मागणी करण्यात आलेली आहे.

सदरचे निवेदन आगार व्यवस्थापक, संभाजीनगर बसस्थानक कोल्हापूर यांना 'शहरभान' च्या वतीने देण्यात आलेले आहे. असे पत्रक अमरदीप कुंडले यांनी प्रसिद्धीस दिले आहे..