कोल्हापूर: आज गणेश चतुर्थी असून, गणेशोत्सवाच्या मंगल पर्वाला आजपासून राज्यभरात उत्साहात प्रारंभ झाला आहे. बुद्धीची देवता श्री गणेश हे सुखाची वार्ता देणारे सुखकर्ता तसेच दुःखाचे हरण करणारे दुःखहर्ता आहेत. अशा आपल्या लाडक्या गणरायाचे म्हणजेच गणपती बाप्पाचे आज राज्यासह देशभरात सर्वत्र जल्लोषात आणि उत्साहात आगमन झाले आहे.

चौदा विद्या आणि चौसष्ट कलांचा अधिपती असलेल्या श्री गणरायाची प्राणप्रतिष्ठा आज करण्यात येत आहे. 'गणपती बाप्पा मोरया'च्या जयघोषात घरगुती गणपतींसह सार्वजनिक मंडळांमध्ये ढोल-ताशांच्या गजरात गणेशाच्या मूर्तीची प्राणप्रतिष्ठापना केली जात आहे. सार्वजनिक गणेश मंडळांनी गणरायाच्या आगमनासाठी फुलांची आरास, आकर्षक सजावट, देखावे आणि रोषणाई केली आहे. 

मंगलमूर्तीच्या आगमनाने पुढील १२ दिवस सर्वत्र आनंद, नवचैतन्य, उत्साह आणि भक्तिमय वातावरण पाहायला मिळणार आहे.