मुंबई : विजयादशमीच्या पवित्र मुहूर्तावर दादरच्या ऐतिहासिक ‘शिवतीर्थ’ (शिवाजी पार्क) मैदानावर शिवसेना (उद्धव बाळासाहेब ठाकरे) पक्षाचा दसरा मेळावा अत्यंत उत्साहात आणि तडाखेबंद वातावरणात पार पडला. राज्यातील सत्तासंघर्षापलीकडे जाऊन यंदाच्या मेळाव्यात शिवसेना पक्षप्रमुख उद्धव ठाकरे यांनी केंद्र आणि राज्य सरकारवर अत्यंत आक्रमक शब्दांत निशाणा साधला.

 “संविधानाच्या रक्षणासाठी आणि हुकूमशाहीला दणका देण्यासाठी शिवसैनिकांनी मशाल धगधगत ठेवली पाहिजे,” अशी हाक त्यांनी यावेळी दिली.

भाषणाच्या सुरुवातीलाच शिवसैनिकांच्या प्रचंड गर्दीला संबोधित करताना उद्धव ठाकरेंनी जुन्या राजकीय युतीचा समाचार घेतला. “यांच्याबरोबर युतीची २५ वर्षे सडली,” अशा शब्दांत त्यांनी भाजपवर तोफ डागली. तसेच, देशात आणि राज्यात केवळ संभ्रम निर्माण करण्याचे राजकारण सुरू असून विरोधकांची बदनामी व चारित्र्यहनन करण्याचे षडयंत्र रचले जात असल्याचा गंभीर आरोप त्यांनी केला.

सध्याच्या राजकीय वातावरणावर ताशेरे ओढताना ठाकरे म्हणाले की, “गद्दारांना ५० कोटी दिले जातात आणि अन्नदात्या शेतकऱ्यांना मात्र मदतीच्या नावाखाली अवघे ५ हजार रुपये दिले जातात. सत्तेतील खुर्ची टिकवण्यासाठी कसला कारभार सुरू आहे?” असा सवाल त्यांनी विचारला. तसेच, “गेली कित्येक वर्षे सत्तेत बसूनही जर वारंवार ‘हिंदू खतरे में है’ अशी आवई उठवावी लागत असेल, तर तुम्हीच हिंदुत्व नासवून बदनाम करत आहात,” असे म्हणत त्यांनी सत्ताधाऱ्यांच्या हिंदुत्वाच्या मुद्द्यावर प्रश्नचिन्ह उपस्थित केले.

दरवर्षीप्रमाणे यंदाही मुंबईतील शिवाजी पार्क मैदानात उद्धव ठाकरेंचा मेळावा घेण्यासाठी मोठी तयारी करण्यात आली होती. मुंबई महानगरपालिकेने घातलेल्या २४ अटी-शर्तींचे पालन करत हा मेळावा पार पडला. राज्यभरातून आलेल्या हजारो शिवसैनिकांच्या उपस्थितीमुळे संपूर्ण शिवाजी पार्क परिसर भगमय झाला होता. दसऱ्याच्या या सोहळ्यात उद्धव ठाकरेंनी केलेल्या आक्रमक भाषणामुळे आगामी राजकीय संघर्षाचे रणशिंग फुंकले गेले असल्याची चर्चा राजकीय वर्तुळात रंगली आहे.