कोल्हापूर: अखिल भारतीय मराठी चित्रपट महामंडळाच्या निवडणुकीत मेघराज राजेभोसले यांच्या नेतृत्वाखालील ‘समर्थ पॅनेल’ने १७ पैकी १६ जागांवर विजय मिळवत एकहाती वर्चस्व सिद्ध केले आहे. महामंडळाच्या कारभारावर रंगकर्मींनी दाखवलेला विश्वास या निकालातून स्पष्ट झाला असून, विजय पाटकर व आनंद काळे यांच्या नेतृत्वाखालील ‘चित्रकर्मी पॅनेल’चा या निवडणुकीत दारुण पराभव झाला.

 कोल्हापूर येथील राम गणेश गडकरी सभागृहात निवडणूक निर्णय अधिकारी रोहिणी खडके यांच्या मार्गदर्शनाखाली पार पडलेल्या मतमोजणीत समर्थ पॅनेलच्या उमेदवारांनी दीडशे ते दोनशे मतांच्या फरकाने बाजी मारली. या निवडणुकीत मेघराज राजेभोसले, सुशांत शेलार आणि वासू पाटील हे दिग्गज उमेदवार विजयी झाले आहेत, तर ज्येष्ठ अभिनेत्री वर्षा उसगावकर, गायक आनंद शिंदे आणि विजय खोचीकर हे बिनविरोध निवडून आले. निकाल जाहीर होताच समर्थ पॅनेलच्या कार्यकर्त्यांनी गुलालाची उधळण, फटाक्यांची आतषबाजी आणि ढोल-ताशांच्या गजरात जल्लोष केला.

 विजयानंतर बोलताना मेघराज राजेभोसले यांनी रंगकर्मींच्या विश्वासाला तडा जाऊ देणार नसल्याचा निर्धार व्यक्त केला असून, महामंडळाचा कारभार यापुढेही पारदर्शकपणे सुरू राहील, अशी ग्वाही दिली आहे.