कोल्हापूर हादरले! भररस्त्यात कुख्यात गुंडावर गोळीबार; शहरात खळबळ
schedule16 Jul 26 person by visibility 346 categoryगुन्हे
कोल्हापूर: कोल्हापूर शहरातील रंकाळा परिसरात आज एक धक्कादायक घटना समोर आली आहे. कुख्यात गुन्हेगार सुरज साखरे याच्यावर अज्ञात हल्लेखोरांनी भररस्त्यात गोळीबार केल्याने शहरात मोठी खळबळ उडाली आहे.
मिळालेल्या प्राथमिक माहितीनुसार, कोल्हापुरातील फुलेवाडी रिंगरोड परिसरात, नाना पाटील चौकाजवळ सुरज साखरे आपल्या वाहनातून जात असताना ही घटना घडली. अज्ञात हल्लेखोरांनी साखरेच्या दिशेने सहा गोळ्या झाडल्या, त्यापैकी दोन गोळ्या त्याला लागल्याची माहिती समोर येत आहे.
पोलीस तपास सुरू
या हल्ल्यात सुरज साखरे जखमी झाला असून, त्याला उपचारासाठी तातडीने रुग्णालयात दाखल करण्यात आले आहे. या घटनेची माहिती मिळताच स्थानिक गुन्हे अन्वेषण शाखा (LCB), करवीर पोलीस आणि जुना राजवाडा पोलीस ठाण्याचे अधिकारी तातडीने घटनास्थळी दाखल झाले आहेत.
पोलिसांनी घटनास्थळाचा पंचनामा सुरू केला असून हल्लेखोरांचा शोध घेण्यासाठी पथके रवाना केली आहेत. या प्रकरणातील आरोपींचा शोध घेण्यासोबतच, हा हल्ला नेमका कोणत्या कारणातून झाला—यामागे जुन्या वैमनस्याचा टोळीसंघर्षाचा संबंध आहे का, किंवा इतर कोणताही हेतू आहे का—याचा कसून तपास पोलीस करत आहेत.
