कोल्हापूर: येथील ऐतिहासिक बिंदू चौक मैदानावर गेली २८ वर्षे यशस्वी परंपरा असलेल्या 'ईद फेस्टिव्हल २०२६'चे उद्घाटन कोल्हापूर महानगरपालिकेचे उपमहापौर अक्षय जरग यांच्या हस्ते मंगळवारी मोठ्या उत्साहात संपन्न झाले. या कार्यक्रमाच्या अध्यक्षस्थानी शिवसेना (शिंदे गट) कोल्हापूर महानगरपालिकेचे गटनेते शारंगधर देशमुख होते. 

या फेस्टिव्हलचे वैशिष्ट्य म्हणजे 'ना नफा ना तोटा' या तत्त्वावर नागरिकांना अत्यावश्यक वस्तू एकाच छताखाली उपलब्ध करून देण्यात आल्या आहेत. यामध्ये प्रामुख्याने ड्रायफ्रूट्स, मसाले, अत्तर, हैद्राबादी व लखनवी इमिटेशन ज्वेलरी, कॉस्मेटिक्स आणि क्रॉकरी सेट अशा विविध वस्तूंचे स्टॉल्स लावण्यात आले आहेत.

या उद्घाटन सोहळ्याचे औचित्य साधून नगरसेवक आश्किन आजरेकर यांच्या वाढदिवसानिमित्त महानगरपालिकेच्या सफाई कर्मचाऱ्यांना  उन्हापासून संरक्षणासाठी मोफत पांढऱ्या टोप्यांचे वाटप करण्यात आले. या कार्यक्रमाला परिवहन सभापती सत्यजित जाधव, महिला व बालकल्याण सभापती कौसर बागवान, ऋतुराज क्षीरसागर, नगरसेवक अजय इंगवले, अर्जुन माने, संजय कदम, तसेच नगरसेविका स्वालिया बागवान, अनुराधा मुळीक, दिलशाद मुल्ला, निलोफर आजरेकर यांच्यासह नेहरू हायस्कूलचे चेअरमन रफिक शेख आणि मुस्लिम बोर्डिंगचे संचालक हाजी लियाकत मुजावर, हाजी जहांगीर अत्तार, हाजी फारुख पटवेगार उपस्थित होते.

या फेस्टिव्हलची यशस्वी धुरा संस्थापक गणी आजरेकर आणि त्यांची कमिटी सांभाळत असून, कार्यक्रमाचे नियोजन अशफाक आजरेकर यांनी केले. उद्घाटन प्रसंगी कमिटीचे सदस्य शौकत बागवान, रहिम महात, निलेश भोसले, मुस्तफा मणेर, इजाज मोमीन यांच्यासह सामाजिक कार्यकर्ते बापूसाहेब मुल्ला, सत्तार मुल्ला, युवराज कुरणे आणि मोठ्या संख्येने नागरिक उपस्थित होते.