कोल्हापूर : शहरातील थकीत घरफाळा वसुलीला गती देण्यासाठी थकबाकीदार मिळकतधारकांवर सक्तीची कारवाई करण्याचे आदेश आयुक्त डॉ.राजेंद्र भारुड यांनी घरफाळा विभागास दिले. महापालिकेच्या छत्रपती ताराराणी सभागृहात आज घरफाळा विभागाची लिपिकनिहाय आढावा बैठक घेणत आली.

आयुक्त डॉ.राजेंद्र भारुड यांनी बोलताना चांगली वसुली करणाऱ्या लिपिकांचे कौतुक केले, तर कमी वसुली असलेल्या कर्मचाऱ्यांवर नाराजी व्यक्त केली. ३५ टक्क्यांपेक्षा कमी वसुली करणाऱ्या लिपिकांना नोटिसा देण्याचे तसेच अत्यल्प वसुली करणाऱ्यांचा पगार तातडीने रोखण्याचे आदेश त्यांनी करनिर्धारक व संग्राहकांना दिले. पुढील महिन्यापर्यंत कामगिरीत सुधारणा न झाल्यास संबंधितांवर कठोर कारवाईचा इशाराही त्यांनी दिला. शहरातील अनधिकृत मिळकती, भाडेकरू वापर असूनही मालक वापराप्रमाणे आकारणी झालेल्या प्रकरणांची तातडीने दुरुस्ती करून दंडासह वसुली करावी, तसेच अनधिकृत लॉजिंग व व्यावसायिक मिळकतींवर आवश्यकतेनुसार सीलची कारवाई करावी, असेही निर्देश देण्यात आले.

 थकबाकीदारांना तत्काळ नोटिसा व एसएमएस पाठविणे, शहरातील सर्व पात्र मिळकतींना घरफाळा आकारणी करणे आणि व्यावसायिक मिळकतींची थकबाकी वसूल करण्यासाठी विशेष मोहीम राबविण्याचे आदेशही आयुक्तांनी दिले. नियमित घरफाळा भरणाऱ्या नागरिकांना त्रास न देता अधिकारांचा योग्य वापर करून थकबाकीदारांवर कारवाई करावी, तसेच दर १५ दिवसांनी वसुलीचा आढावा घेण्याचे निर्देश त्यांनी दिले.

या बैठकीस उपआयुक्त परितोष कंकाळ, सहायक आयुक्त उज्वला शिंदे, स्वाती दुधाणे, करनिर्धारक व संग्राहक सुधाकर चल्लावाड, करअधीक्षक अशोक यादव, मदन ठाणेकर, दत्तप्रसाद माजगांवकर, अच्युत अडुकर, अधिक्षक अर्चना प्रभावळे तसेच घरफाळा विभागाचे कर्मचारी उपस्थित होते.