कोल्हापूर : कोल्हापूर जिल्ह्यातील वाढत्या वाहन चोरीच्या गुन्ह्यांना आळा घालण्यासाठी स्थानिक गुन्हे अन्वेषण शाखेने धडक कारवाई केली आहे. शाहूपुरी पोलीस ठाण्याच्या हद्दीतील चोरीची एक स्प्लेंडर बाईक विक्री करण्यासाठी तीन जण कळंबा परिसरात येणार असल्याची गुप्त माहिती पोलीस अंमलदार लखनसिंह पाटील यांना मिळाली होती. या माहितीच्या आधारे पोलीस उपनिरीक्षक संतोष गळवे यांच्या पथकाने कळंबा येथे तात्काळ सापळा लावून साहिल शशिकांत म्हातुगडे (वय २१) आणि करण शिवाजी बचाटे (वय २१, दोघे रा. सोनाळी, ता. कागल) या दोन आरोपींसह एका विधीसंघर्षग्रस्त बालकाला (अल्पवयीन) ताब्यात घेतले. ताब्यात घेतलेल्या संशयितांची पोलिसांनी सखोल चौकशी केली असता, त्यांनी आणखी दोन दुचाकी चोरी केल्याची कबुली दिली.

 पोलिसांनी या कारवाईत २ लाख २५ हजार रुपये किमतीच्या एकूण ४ मोटार सायकली हस्तगत केल्या असून यामुळे ३ गुन्हे उघडकीस आणण्यात यश आले आहे. जप्त करण्यात आलेल्या वाहनांमध्ये शाहूपुरी पोलीस ठाण्याच्या हद्दीतून चोरी झालेली स्प्लेंडर (MH-09-CN-3219), गोकुळ शिरगाव हद्दीतील स्प्लेंडर (MH-09-BT-0716), शाहूपुरी हद्दीतील बुलेट (AP-28-BX-5527) आणि आरोपींनी गुन्हा करण्यासाठी वापरलेली स्वतःची ॲक्टिव्हा (MH-09-GY-9058) यांचा समावेश आहे.

पुढील तपासासाठी अटक केलेले आरोपी आणि जप्त केलेला मुद्देमाल शाहूपुरी पोलिसांच्या ताब्यात देण्यात आला आहे. ही यशस्वी कारवाई कोल्हापूरचे पोलीस अधीक्षक नीलोत्पल, अपर पोलीस अधीक्षक डॉ. बी. बी. धीरजकुमार यांच्या मार्गदर्शनाखाली स्थानिक गुन्हे शाखेचे पोलीस निरीक्षक सुशांत चव्हाण व त्यांच्या तपास पथकाने केली आहे.