◼️मराठी साहित्याचा जागर; मुख्याध्यापिका एस. आर. पाटील यांनी उलगडला भाषेचा समृद्ध वारसा

कोल्हापूर : मराठी भाषेचे वैभव आणि थोर साहित्यिक वि. वा. शिरवाडकर ऊर्फ 'कुसुमाग्रज' यांचा वारसा जपण्यासाठी, येथील प्रिन्सेस पद्माराजे गर्ल्स हायस्कूलमध्ये 'मराठी राजभाषा दिन' मोठ्या उत्साहात आणि चैतन्यमय वातावरणात साजरा करण्यात आला.

कार्यक्रमाच्या सुरुवातीला कुसुमाग्रजांच्या प्रतिमेचे पूजन करण्यात आले. मराठी विभागप्रमुख एम. एम. भांडवले यांनी कुसुमाग्रजांचा जीवनप्रवास आणि त्यांच्या अजरामर साहित्याचा परिचय करून दिला. शिक्षिका सुवर्णा पवार यांनी कुसुमाग्रजांच्या साहित्यिक योगदानावर प्रकाश टाकला, तर काळे सर यांनी मराठी भाषेचा गौरव करणारी ओघवत्या शैलीत कविता सादर करून उपस्थितांची मने जिंकली.

प्रशालेतील विद्यार्थिनी अरुंधती खवास, स्नेहल पाटील व संस्कृती पाटील यांनी आपल्या मनोगतातून मराठी भाषेचे महत्त्व आणि तिची थोरवी विषद केली. ज्येष्ठ शिक्षिका आर. व्ही. मगरे यांनी विद्यार्थिनींना अवांतर वाचनाची गोडी लावण्याचे आणि मराठी साहित्य अभ्यासण्याचे आवाहन केले.

कार्यक्रमाच्या अध्यक्षा आणि प्रशालेच्या मुख्याध्यापिका एस. आर. पाटील यांनी आपल्या अध्यक्षीय भाषणात मराठी भाषेचे जागतिक स्थान अधोरेखित केले. त्यांनी ज्येष्ठ कवी ना. धो. महानोर यांची 'मुलगा' ही कविता अत्यंत प्रभावीपणे सादर केली, ज्याला विद्यार्थिनींनी उत्स्फूर्त दाद दिली.

या दिनाचे औचित्य साधून वाडकर सर यांनी प्रशालेच्या मुख्य फलकावर सुंदर काव्यपंक्तीसह आकर्षक फलक लेखन केले होते, जे सर्वांचे लक्ष वेधून घेत होते.
या प्रसंगी पर्यवेक्षिका ए. एस. आंबर्डेकर यांच्यासह सर्व मराठी विषय शिक्षक व शिक्षिका उपस्थित होत्या. कार्यक्रमाचे नेटके सूत्रसंचालन एन. ए. पुणेकर यांनी केले, तर एस. एस. गोणी यांनी उपस्थितांचे आभार मानले.