◼️विद्यार्थी, संशोधक व नवउद्योजकांना सहभागी होण्याचे आवाहन; १७ ऑगस्टपर्यंत नोंदणीची संधी

कोल्हापूर : नाविन्यपूर्ण कल्पनेला केवळ कल्पनेपुरते मर्यादित न ठेवता तिचे बाजारपेठेतील यशस्वी उत्पादन किंवा सेवेत रूपांतर करण्यासाठी आवश्यक मार्गदर्शन देणाऱ्या ‘कल्पनेपासून उद्योगापर्यंत – कल्पनेचे यशस्वी उद्योगात रूपांतर’ या एकदिवसीय कार्यशाळेचे आयोजन केआयटीच्या इनोव्हेशन अँड रिसर्च फाउंडेशनतर्फे करण्यात आले आहे.

ही कार्यशाळा शुक्रवार, २१ ऑगस्ट २०२६ रोजी सकाळी ९ ते सायंकाळी ५ या वेळेत केआयटी कॉलेजमधील इनोव्हेशन अँड रिसर्च फाउंडेशन विभागात होणार आहे. विद्यार्थी, संशोधक, नवउद्योजक, स्टार्टअप संस्थापक, सूक्ष्म, लघु व मध्यम उद्योग क्षेत्रातील व्यावसायिक तसेच व्यवसाय सुरू करण्याची इच्छा असणाऱ्यांसाठी कार्यशाळा खुली आहे.

कल्पनेपासून बाजारपेठेपर्यंतचा संपूर्ण प्रवास समजून घेण्यासाठी कार्यशाळेत व्यवसाय संधी ओळखणे, ग्राहकांच्या गरजांची पडताळणी, बाजारपेठेचा अभ्यास, व्यवसाय प्रारूप तयार करणे, शासकीय योजना, निधीची उपलब्धता, उद्योगवर्धन आणि तज्ज्ञांचे मार्गदर्शन याबाबत मार्गदर्शन केले जाणार आहे. प्रात्यक्षिके, चर्चासत्रे आणि प्रश्नोत्तरांच्या माध्यमातून सहभागीांना आपल्या स्वतःच्या कल्पनेवर प्रत्यक्ष काम करण्याची संधी मिळणार आहे.

डॉ. मोहन वनरोट्टी, प्रकल्प प्रमुख ,महाराष्ट्र स्टेट इनोव्हेशन सोसायटी आणि भारत सरकारच्या विज्ञान आणि तंत्रज्ञान विभाग निधी आय टीबीआय यांच्यासह सुधीर आरळी प्रदीप रासनकर, देवेंद्र पाठक आणि समीर पुनसकर हे तज्ज्ञ मार्गदर्शन करणार आहेत.

 सहभागीांना सहभाग प्रमाणपत्र, उपयुक्त व्यवसाय साधने, तज्ज्ञांशी संपर्काची संधी तसेच निवडक कल्पनांसाठी पुढील मार्गदर्शन आणि उद्योगवर्धनाच्या संधी उपलब्ध करून दिल्या जाणार आहेत.
महाराष्ट्र राज्य इनोव्हेशन सोसायटी, कौशल्य विकास व उद्योजकता विभाग, महाराष्ट्र शासन, विज्ञान व तंत्रज्ञान विभाग, भारत सरकार आणि निधी आय-टीबीआय यांच्या सहकार्याने कार्यशाळेचे आयोजन करण्यात आले आहे.

नाविन्यपूर्ण कल्पना असलेल्या विद्यार्थी, संशोधक आणि नवउद्योजकांनी ‘कल्पनेपासून उद्योगापर्यंत’ कार्यशाळेत सहभागी होऊन आपल्या कल्पनेला उद्योगाची दिशा द्यावी व या संधीचा लाभ घ्यावा,” असे आवाहन डॉ. मोहन वनरोट्टी यांनी केले. केआयटीचे अध्यक्ष साजिद हुदली, उपाध्यक्ष सचिन मेनन आणि सचिव दीपक चौगुले यांच्या मार्गदर्शनाखाली हा उपक्रम राबविण्यात येत आहे.
कार्यशाळेसाठी नोंदणी सुरू असून जागा मर्यादित आहेत. इच्छुकांनी नोंदणी शुल्क भरून १७ ऑगस्ट २०२६ पर्यंत लवकरात लवकर नोंदणी करावी, असे आवाहन आयोजकांनी केले आहे. अधिक माहितीसाठी केआयटी आय.आर.एफ च्या अधिकृत संकेतस्थळाला भेट द्यावी किंवा येथील केआयटी कॉलेजमधील कार्यालयाशी संपर्क साधावा.