गडहिंग्लज : गडहिंग्लज तालुक्यातील भडगाव येथे हिरण्यकेशी नदीवर नवीन पुलाचे बांधकाम सुरू आहे. या कामासाठी नदीपात्रात तयार करण्यात आलेला पर्यायी पूल (कॉजवे) वाढत्या जलप्रवाहामुळे खचू लागला आहे. प्रवाशांच्या सुरक्षेचा विचार करता, प्रशासनाने या पर्यायी पुलावरील वाहतूक तातडीने बंद केली आहे.

नदीतील पाण्याचा स्तर वाढत असल्याने पुलाचा काही भाग खचल्याचे निदर्शनास आले. कोणताही अनुचित प्रकार घडू नये म्हणून प्रशासनाने पुलाच्या दोन्ही बाजूंना बॅरिकेड्स लावून आणि फ्लेक्सद्वारे सूचना देऊन वाहतूक बंद केली आहे.

 सुरक्षेच्या कारणास्तव त्या ठिकाणी कर्मचाऱ्यांचीही नियुक्ती करण्यात आली आहे.यामुळे गडहिंग्लजकडून चंदगडकडे जाणारी सर्व वाहतूक आता आजरा-गजरगाव मार्गे वळवण्यात आली आहे. वाहनधारकांनी प्रशासनाच्या सूचनांचे पालन करावे आणि पर्यायी मार्गाचा वापर करावा, असे आवाहन करण्यात आले आहे.