कोल्हापूर : सांगली येथे नुकत्याच संपन्न झालेल्या २२ व्या खुल्या फिडे रेटिंग जलद बुद्धिबळ स्पर्धेत कोल्हापूरच्या शिरपेचात मानाचा तुरा रोवला गेला आहे. साळोखेनगर येथील डी. वाय. पाटील विद्यानिकेतन स्कूलमध्ये इयत्ता पहिलीत शिकणाऱ्या शिवराज उत्तम कामते याने आपल्या अष्टपैलू खेळाचे प्रदर्शन करत ८ वर्षाखालील वयोगटात घवघवीत यश संपादन केले. अनुज् चेस ॲकॅडमीचा विद्यार्थी असलेल्या शिवराजने या अत्यंत चुरशीच्या स्पर्धेत एकूण ९ फेऱ्यांपैकी ३.५ गुण मिळवून सर्वांचे लक्ष वेधून घेतले.

या यशाचे विशेष वैशिष्ट्य म्हणजे, शिवराजने मिळविलेल्या ३.५ गुणांपैकी १.५ गुण हे आंतरराष्ट्रीय मानांकन (रेटेड) असलेल्या अनुभवी खेळाडूंविरुद्ध झुंज देऊन मिळवले आहेत. त्याच्या या सातत्यपूर्ण कामगिरीमुळे लवकरच त्याचे आंतरराष्ट्रीय बुद्धिबळ मानांकन (FIDE Rating) सुरू होण्याचा मार्ग मोकळा झाला आहे. इतक्या लहान वयात त्याने दाखवलेली एकाग्रता आणि खेळातील कौशल्य कौतुकास्पद ठरत आहे.

शिवराजला या स्पर्धेसाठी जिल्हा चेस असोसिएशन कोल्हापूरचे खजिनदार आणि बुद्धिबळ प्रशिक्षक बाबूराव पाटील तसेच प्रशिक्षिका अनुष्का कृष्णात पाटील यांचे मोलाचे मार्गदर्शन लाभले. त्याच्या या यशाबद्दल शाळेचे शिक्षक, पालक आणि क्रीडाप्रेमींकडून त्याच्यावर अभिनंदनाचा वर्षाव होत आहे.