• विविध विभागातील महिला अधिकारी, कर्मचारी सहभागी

कोल्हापूर : शाही दसरा महोत्सवा अंतर्गत जिल्हा प्रशासनाच्या वतीने विविध विभागातील महिला अधिकारी, कर्मचाऱ्यांची रॅली पार पडली. या रॅलीमध्ये महसूल, पोलीस, आरोग्य, माहिती व जनसंपर्क आदी विविध विभागातील महिला अधिकारी, कर्मचारी पारंपरिक वेशात सहभागी झाल्या होत्या. रॅली ची सुरुवात जिल्हा शल्य चिकित्सक डॉ. सरिता थोरात यांच्या हस्ते करण्यात आली. यावेळी सहायक संचालक (माहिती) वृषाली पाटील, नायब तहसीलदार नम्रता चौगुले, पोलीस उपनिरीक्षक हेमा पाटील, ॲड. गौरी पाटील, संयोजन समितीचे प्रमोद पाटील, उदय गायकवाड आदी उपस्थित होते.

जिल्हा प्रशासनाच्या वतीने आयोजित करण्यात आलेल्या या रॅलीचा मार्ग दसरा चौक - बिंदू चौक - उमा टॉकीज- बागल चौक -टाकाळा -  टेंबलाई चौक -कावळा नाका - दाभोळकर कॉर्नर- शाहूपुरी पोलीस स्टेशन - रेल्वे स्टेशन- व्हीनस कॉर्नर मार्गे पुन्हा दसरा चौक असा होता. पाण्याचा वापर जपून करा, पाणी वाचवा, मुलगी वाचवा, हेल्मेट वापरा, व्यसन करुन गाडी चालवू नका, ट्रिपल सीट घेवू नका, वेगाने वाहन चालवू नका, सोशल मीडियापासून मुलींनी सावध राहा, कोणत्याही आमिषाला बळी पडू नका, आई-बाबांचा आदर करा, सायबर फसवणुकीपासून सावध राहा, मोबाईलचा वापर कमीत कमी करा असे सामाजिक संदेश रॅलीतून देण्यात आले. 

राज्यातील दुष्काळ परिस्थितीच्या पार्श्वभूमीवर यावर्षी साधेपणाने दसरा महोत्सव साजरा होत असून आज झालेल्या महिलांच्या रॅलीमध्ये विभागीय माहिती कार्यालयाच्या सहायक संचालक (माहिती) वृषाली पाटील, नायब तहसीलदार नम्रता चौगुले, पोलीस उपनिरीक्षक हेमा पाटील यांच्यासह सुमारे शंभर महिला सहभागी झाल्या. यावेळी त्यांनी दिलेल्या सामाजिक संदेशांच्या घोषणांनी परिसर दुमदुमून गेला.