नवी दिल्ली : २० जूनपासून सुरू असलेल्या आंदोलनाने सोमवारी उग्र रूप धारण केले. 'कॉकरोच जनता पार्टी' (सीजेपी) ने पुकारलेल्या संसद मार्चदरम्यान दिल्लीत मोठा गदारोळ झाला. आंदोलक आणि सुरक्षा दलांमध्ये झालेल्या भीषण झटापटीत ५० पेक्षा जास्त पोलीस आणि निमलष्करी दलाचे जवान जखमी झाले आहेत. याप्रकरणी दिल्ली पोलिसांनी आता तपास यंत्रणांच्या मदतीने यामागील  सूत्रधारांचा शोध सुरू केला आहे.

जंतर-मंतरवरून निघालेल्या सीजेपीच्या कार्यकर्त्यांनी संसद भवनाच्या दिशेने कूच करण्याचा प्रयत्न केला. आंदोलकांना रोखण्यासाठी सुरक्षा दलांनी अश्रूधुराच्या नळकांड्या फोडल्या. पोलिसांनी जंतर-मंतर परिसराचा ताबा घेत अनेक आंदोलकांना ताब्यात घेतले आहे. सीजेपीनेही आपल्या कार्यकर्त्यांना गंभीर दुखापत झाल्याचा दावा केला आहे.

संसदेच्या अत्यंत सुरक्षित भागात वीट-दगड कुठून आले, हा प्रश्न पोलिसांना सतावत आहे. जंतर-मंतरजवळ दगडांनी भरलेला एक ट्रक सापडल्याने, हे आंदोलन पूर्वनियोजित असल्याचे पोलिसांचे म्हणणे आहे. तसेच, आंदोलकांना बाहेरून व्हॉट्सॲप मेसेजद्वारे सूचना मिळत होत्या, असेही तपासात पुढे आले आहे.