कोल्हापूर : जिल्ह्यातील घरफोडीच्या गुन्ह्यांना आळा घालण्यासाठी स्थानिक गुन्हे अन्वेषण शाखेने (LCB) कंबर कसली असून, गडहिंग्लज पोलीस ठाण्याच्या हद्दीतील एक मोठा घरफोडीचा गुन्हा उघडकीस आणला आहे. या कारवाईत पोलिसांनी कर्नाटक राज्यातील हुक्केरी येथील एका रेकॉर्डवरील अट्टल चोरट्याला अटक केली आहे. त्याच्याकडून ५ लाख ३२ हजार ७१३ रुपये किमतीचा मुद्देमाल हस्तगत केला आहे.

स्थानिक गुन्हे अन्वेषण शाखेचे पोलीस निरीक्षक सुशांत चव्हाण यांच्या मार्गदर्शनाखाली पथक घरफोडीच्या गुन्ह्यांचा तपास करत असताना, पोलीस अंमलदार सचिन जाधव यांना खास बातमीदाराकडून महत्त्वपूर्ण माहिती मिळाली. गडहिंग्लज येथील घरफोडीतील संशयित आरोपी आनंदा सोमाप्पा सुटकनवार (वय २८, राहणार हुक्केरी, जिल्हा बेळगाव) हा चोरीचे दागिने घेऊन गडहिंग्लज-संकेश्वर रोडवरील हिटणी फाटा येथे येणार असल्याचे समजले. या माहितीच्या आधारे पोलीस उपनिरीक्षक शेष मोरे यांच्या पथकाने हिटणी फाटा येथे सापळा लावून संशयिताला ताब्यात घेतले.

पोलिसांनी आरोपीची झडती घेतली असता त्याच्याकडे ३३.६२० ग्रॅम सोन्याचे दागिने, १२६.९२० ग्रॅम चांदीचे दागिने आणि भारतीय चलनातील विविध दराची ६८० रुपयांची नाणी असा एकूण ५.३२ लाखांचा मुद्देमाल मिळून आला. सखोल चौकशीत त्याने गडहिंग्लज पोलीस ठाण्यातील गुन्ह्याची कबुली दिली. ही कारवाई पोलीस अधीक्षक योगेश कुमार, अपर पोलीस अधीक्षक अण्णासाहेब जाधव यांच्या मार्गदर्शनाखाली एलसीबीच्या पथकाने यशस्वीरीत्या पार पाडली. अटक केलेल्या आरोपीला पुढील तपासासाठी गडहिंग्लज पोलिसांच्या ताब्यात देण्यात आले आहे.