कोल्हापूर : शहरातील डेंग्यू, रेबीज, कचरा उठाव, स्वच्छता आणि आरोग्य केंद्रांच्या खालावलेल्या सद्यस्थितीवर तातडीने उपाययोजना करण्यासाठी कोल्हापूर महानगरपालिकेच्या आरोग्य समितीची पहिली सभा आज स्थायी समिती सभागृहात पार पडली. आरोग्य समिती सभापती  सुरेखा ओटवकर यांच्या अध्यक्षतेखाली झालेल्या या बैठकीत शहरातील सर्व दवाखान्यांच्या बळकटीकरणावर भर देण्यात आला.

​ उप-आयुक्त किरणकुमार धनवाडे यांनी उपस्थितांचे स्वागत करून शहरातील सर्व दवाखान्यांच्या सद्यस्थितीचा आढावा घेतला. तसेच स्वर्गीय बाळासाहेब ठाकरे निधीअंतर्गत प्राप्त निधी व नियोजित कामांची माहिती सादर केली.

​ उपसभापती वैभव माने यांनी सावित्रीबाई फुले व पंचगंगा रुग्णालयातील वॉर्ड बॉय, आया कम स्विपर आणि ड्रेसर यांसारख्या कर्मचाऱ्यांच्या कमतरतेचा मुद्दा उपस्थित केला. तसेच आरोग्य केंद्रांच्या इमारतींची डागडुजी व सुलभ शौचालयांबाबत प्रश्न मांडले.
​वैद्यकीय अधिकारी भरती: सदस्या सौ. स्वाती येवलूजे यांनी शहरातील फिजिओथेरपी सेंटरमधील वैद्यकीय अधिकारीपदाची भरती प्रक्रिया तात्काळ पूर्ण करण्याचे निर्देश दिले.

​आरोग्य सुविधांना प्राधान्य: शहरातील सर्व आरोग्य समस्या सोडवण्यासाठी जास्तीत जास्त निधी उपलब्ध करून देण्याचे आश्वासन सभापती  सुरेखा ओटवकर यांनी दिले.

​या बैठकीस आरोग्याधिकारी डॉ. प्रकाश पावरा, अधीक्षक सागर कांबळे, रुग्णालयाचे मेडिकल ऑफिसर, आरोग्य विभागाचे कर्मचारी आणि समितीचे सर्व सदस्य उपस्थित होते.