कोल्हापूर : दैनंदिन जीवनातील वास्तव समस्यांवर संख्याशास्त्र उपयुक्त ठरू शकते, याची प्रचिती देणाऱ्या विशेष प्रकल्प सादरीकरण स्पर्धेमध्ये कवठेमहांकाळच्या पद्मभूषण वसंतरावदादा पाटील महाविद्यालयाच्या संघाने प्रथम क्रमांक पटकावला. 

शिवाजी विद्यापीठाचा संख्याशास्त्र अधिविभाग आणि शिवाजी विद्यापीठ संख्याशास्त्र शिक्षक संघटना यांच्या संयुक्त विद्यमाने ‘वास्तव समस्यांचे सांख्यिकीय विश्लेषण’ या विषयावरील एकदिवसीय कार्यशाळेच्या निमित्ताने काल (दि. १०) संख्याशास्त्राच्या बी.एस्सी. तृतीय वर्षाच्या विद्यार्थ्यांसाठी ‘माझ्या परिसरातील प्रति व्यक्ती मासिक वाहन इंधन वापराचा अंदाज’ या विषयावर स्पर्धा घेण्यात आली.

या स्पर्धेत एकूण दहा महाविद्यालयांनी सहभाग नोंदवला. प्रथम फेरीतून एल. बी. एस. महाविद्यालय (सातारा), पी.डी.व्ही.पी. महाविद्यालय (तासगाव), पी.व्ही.पी. महाविद्यालय (कवठेमहांकाळ), विवेकानंद महाविद्यालय (कोल्हापूर) आणि एस.जी.एम. महाविद्यालय (कराड) यांचे संघ अंतिम फेरीसाठी पात्र झाले. या महाविद्यालयांतील विद्यार्थी-विद्यार्थिनींनी कार्यशाळेमध्ये त्यांच्या प्रकल्पांचे सादरीकरण केले. स्पर्धेत विवेकानंद महाविद्यालय, कोल्हापूर यांनी द्वितीय आणि सद्गुरू गाडगेबाबा महाराज महाविद्यालय, कराड यांनी तृतीय क्रमांक पटकावला. परीक्षक म्हणून डॉ. शशिभूषण महाडिक आणि गणेश खटावकर यांनी काम पाहिले.

या कार्यशाळेत ज्येष्ठ संख्याशास्त्रज्ञ डॉ. अनिल गोरे, डॉ. महाडिक आणि डॉ. सोमनाथ पवार यांनी विविध विषयांवर मार्गदर्शन केले.

 कार्यशाळेत कर्मवीर भाऊराव पाटील विद्यापीठ, सातारा, मुंबई विद्यापीठ, मुंबई आणि पुण्यश्लोक अहिल्यादेवी होळकर सोलापूर विद्यापीठाच्या कार्यक्षेत्रातील बी.एस्सी. तृतीय वर्ष सांख्यिकीचे विद्यार्थी व प्राध्यापक मोठ्या संख्येने सहभागी झाले. डॉ. सुकुमार राजगुरू यांनी आभार मानले.