कोल्हापूर : कोल्हापूर जिल्हा सहकारी दूध उत्पादक संघ अर्थात  'गोकुळ' दूधसंघाच्या निवडणुकीबाबत सर्वोच्च न्यायालयाने अत्यंत महत्त्वपूर्ण निकाल दिला आहे. न्यायालयाने स्पष्ट केले आहे की, लोकशाही प्रक्रियेत वेळेवर निवडणुका होणे गरजेचे असून, येत्या ९० दिवसांच्या आत गोकुळची संपूर्ण निवडणूक प्रक्रिया पूर्ण करण्यात यावी. या निकालामुळे गेल्या अनेक दिवसांपासून प्रलंबित असलेल्या राजकीय संघर्षाला आता नवी दिशा मिळाली आहे.

दरम्यान, दूधसंघावर प्रशासक नियुक्त करण्याबाबतच्या वादावर न्यायालयाने तूर्तास कोणताही अंतिम निर्णय न देता, याप्रकरणी मुंबई उच्च न्यायालयात दाद मागण्याचे निर्देश दिले आहेत. त्यामुळे प्रशासक राहणार की जुन्या संचालक मंडळाला मुदतवाढ मिळणार, हे आता हायकोर्टाच्या निकालावर अवलंबून असेल.

सर्वोच्च न्यायालयाच्या या निर्णयामुळे कोल्हापूरच्या राजकीय वर्तुळात मोठी खळबळ उडाली असून, सत्ताधारी आणि विरोधी अशा दोन्ही गटांकडून आता निवडणुकीच्या मोर्चेबांधणीला वेग येणार आहे.