कोल्हापूर : ‘विविध संशोधन प्रकल्पांसाठी लागणारा निधी कसा मिळवायचा, मिळणाऱ्या निधीचा योग्य वापर कसा करायचा आणि त्याची नितीमानता’ या विषयावरील एकदिवसीय कार्यशाळा उद्या, शनिवारी (दि. २१) सकाळी ९ ते २ या वेळेत शिवाजी विद्यापीठात आयोजित करण्यात आली आहे, अशी माहिती वि‌द्यापीठातील स्कूल ऑफ नॅनो सायन्स अॅड बायोटेक्नॉलॉजीचे संचालक तसेच ए.एन.आर.एफ.-पेअर, आयआयएससी-एसयूके स्पोकचे प्रमुख अन्वेषक डॉ. किरणकुमार शर्मा यांनी दिली.

प्रा. शर्मा यांनी दिलेल्या माहितीनुसार, ही कार्यशाळा शिवाजी वि‌द्यापीठ तसेच संलग्न महावि‌द्यालयांतील प्राध्यापक व संशोधक विद्यार्थ्यांसाठी अत्यंत उपयुक्त असून ती केवळ पहिल्या १५० नोंदणीकृत सहभागींसाठीच आहे. इंडियन इन्स्टिट्यूट ऑफ सायन्स (बेंगलोर) येथील विश्वविख्यात शास्त्रज्ञ डॉ. अशोक रायचूर यांच्या हस्ते कार्यशाळेचे उद्घाटन होईल. अध्यक्षस्थानी विद्यापीठाचे प्रभारी कुलगुरू डॉ. सुरेश गोसावी असतील, तर प्रभारी प्र-कुलगुरू डॉ. ज्योती जाधव यांची प्रमुख उपस्थिती असेल.
कार्यशाळेमध्ये 'संशोधनासाठी निधी कसा प्राप्त करावयाचा' याविषयी डॉ. रोहित कुमार, 'संशोधन प्रकल्प कसा लिहावा' याविषयी डॉ. विक्रम जयराम, 'विज्ञान आणि तंत्रज्ञानातल्या संशोधनातील योग्य नितीमत्ता' याविषयी डॉ. टी. ए. अभिनंदन मार्गदर्शन करणार आहेत. त्याशिवाय, डॉ. आदित्य सधनाला, एएनआरएफ-पेअर उपक्रमाच्या आयआयएससी-एसयूके स्पोकचे समन्वयक डॉ. सचिन रॉन्डीया हे देखील मार्गदर्शन करतील.

भारतातील नवोन्मेषी संशोधन आणि विकासाला चालना देण्याच्या दृष्टीने केंद्रीय विज्ञान व तंत्रज्ञान मंत्रालयाच्या अत्यंत महत्त्वाकांक्षी अशा एएनआरएफ-पेअरच्या हब अँड स्पोक उपक्रमांतर्गत शिवाजी वि‌द्यापीठ देशातील आघाडीच्या इंडियन इन्स्टिट्यूट ऑफ सायन्स, बंगळूर या हबशी स्पोक म्हणून जोडले गेले आहे. देशात अशा एकूण ३२ हब्जची नियुक्ती करण्यात आली असून त्यांपैकी केवळ सातच हब्जना कॅटेगरी-ए म्हणून गणले गेले आहे. या कॅटेगरीतील प्रत्येक हबला १०० कोटी रुपयांचा निधी प्रदान करण्यात आलेला आहे. याअंतर्गत शिवाजी वि‌द्यापीठासही सहा कोटी रुपयांचे अनुदान प्राप्त झाले आहे, अशी माहिती डॉ. शर्मा यांनी दिली. 

कार्यशाळेच्या यशस्वितेसाठी डॉ. कल्याणराव गरडकर, डॉ. किरण पवार, डॉ. तुकाराम डोंगळे आणि प्रकाश यादव यांच्यासह त्यांचे सहकारी परिश्रम घेत आहेत.